ରାଞ୍ଚି : ଝାଡ଼ଖଣ୍ଡ ବିଧାନସଭା ନିର୍ବାଚନର ଭୋଟ ଗଣତି ପ୍ରାୟତଃ ଶେଷ ପର୍ୟ୍ୟାୟରେ ପହଞ୍ଚିଛି। ରାଜ୍ୟର ନିର୍ବାଚନ ଫଳାଫଳକୁ ଦେଖିଲେ ଶାସକ ବିଜେପିକୁ ଏକ ବଡ଼ ଝଟକା ଲାଗିଥିବାବେଳେ ଜେଏମ୍ଏମ୍- କଂଗ୍ରେସ- ଆର୍ଜେଡି ମେଣ୍ଟ ରାଜ୍ୟରେ ନୂତନ ସରକାର ଗଠନ କରିବା ଏକପ୍ରକାର ସ୍ପଷ୍ଟ ହୋଇଛି। ସନ୍ଧ୍ୟା ୭.୨୨ଟା ସୁଦ୍ଧା ନିର୍ବାଚନ କମିଶନଙ୍କ ୱେବ୍ସାଇଟ୍ରୁ ମିଳିଥିବା ସୂଚନା ଅନୁସାରେ ରାଜ୍ୟରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା(ଜେଏମଏମ)-କଂଗ୍ରେସ ଓ ଆରଜେଡି ମହାମେଣ୍ଟକୁ ବହୁମତ ମିଳିଛି। ରାଜ୍ୟରେ ସରକାର ଗଠନ ଲାଗି ମ୍ୟାଜିକ ନମ୍ବର ୪୧ର ଆବଶ୍ୟକତା ଥିବାବେଳେ ମହାମେଣ୍ଟ ୪୬ଟି ଆସନରେ ଆଗୁଆ ଥିବା ଜଣାପଡ଼ିଛି। ଜେଏମଏମ ୩୦, କଂଗ୍ରେସ ୧୫ ଏବଂ ଆରଜେଡି ୧ଟି ଆସନରେ ଆଗୁଆ ରହିଛନ୍ତି।
ଅନ୍ୟପଟେ ବିଜେପି ୨୬ଟି ଆସନରେ ଆଗୁଆ ରହିଛି। ସେହିପରି ଅନ୍ୟ ଆଞ୍ଚଳିକ ଦଳ ଝାଡ଼ଖଣ୍ଡ ବିକାଶ ମୋର୍ଚ୍ଚା(ଜେଭିଏମ) ୩ଟି, ଏଜେଏସୟୁ ୨ଟି, ଏନସିପି ୧ଟି, ସିପିଆଇଏମଏଲ ୧ଟି ଏବଂ ସ୍ବାଧୀନ ପ୍ରାର୍ଥୀ ୨ଟି ଆସନରେ ଆଗୁଆ ଥିବା ସୂଚନା ମିଳିଛି।
