ଭୁବନେଶ୍ୱର: ଦୀର୍ଘଦିନ ଧରି ଜଟଣୀ ନିର୍ବାଚନମଣ୍ଡଳୀର ଲୋକେ ନିଜର ସ୍ଥିତବାନ ଜମି ପାଇଁ ଭୋଗୁଥିବା ସମସ୍ୟାକୁ ନେଇ ବୁଧବାର ଜଟଣୀ ବିଧାୟକ ସୁର ରାଉତରାୟ ଏବଂ ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ରାଜସ୍ୱ ପରିଷଦ ସଭ୍ୟଙ୍କୁ ଭେଟିଛନ୍ତି। ଜଟଣୀବାସୀଙ୍କ ସମସ୍ୟା ସମ୍ପର୍କରେ ଉଭୟ ନେତା ଆଲୋଚନା କରିଛନ୍ତି। ଜଟଣୀ ବିଧାନସଭା ନିର୍ବାଚନମଣ୍ଡଳୀର ୩୬ଟି ଗାଁରେ ପ୍ରାୟ ୩ ଲକ୍ଷ ଲୋକଙ୍କ ସ୍ଥିତବାନ ଜମି ସେମାନଙ୍କ ପାଖକୁ ଆସିପାରି ନାହିଁ। ଏହି ମାମଲାରେ ଲୋକେ କୌଣସିପ୍ରକାର ସାହାଯ୍ୟ ପାଇପାରୁ ନଥିବା କହିଛନ୍ତି ସାଂସଦ ଅପରାଜିତା ଷଡଙ୍ଗୀ।
ବାରମ୍ବାର ଏନେଇ ଅଭିଯୋଗ ହୋଇଥିଲେ ମଧ୍ୟ କିଛି ହେଲା ସୁଫଳ ମିଳିନଥିଲା । ଏନେଇ ହାଇକୋର୍ଟରେ ଏକ ରିଟ୍ପିଟିସନ୍ ଦାଖଲ ହୋଇଥିଲା। ହାଇକୋର୍ଟ ଉଭୟ ପକ୍ଷକୁ ଶୁଣି ମାମଲାର ସମାଧାନ କରିବା ପାଇଁ ବୋର୍ଡ଼ ଅଫ୍ ରେଭିନ୍ୟୁକୁ ନିର୍ଦ୍ଦେଶ ଦେଇଥିଲେ। ଏହି ଘଟଣାର ତଦନ୍ତ କରି ଜମି ଫେରସ୍ତ କରିବାକୁ ନିର୍ଦ୍ଦେଶ ଦେଇଥିଲେ।ଏଥିପାଇଁ ହାଇକୋର୍ଟ ୬ମାସ ସମୟ ଦେଇଥିଲେ। ଆସନ୍ତା ୧୨ତାରିଖରେ ହାଇକୋର୍ଟ ଦେଇଥିବା ସମୟ ସୀମା ଶେଷ ହେଉଛି। ତେଣୁ ବୁଧବାର ବିଧାୟକ ଏବଂ ସାଂସଦ ଏକାଠି ହୋଇ ରାଜସ୍ୱ ପରିଷଦ ସଭ୍ୟଙ୍କୁ ଭେଟିଥିଲେ। ଦିର୍ଘ ୬ ମାସ ବିତିଯାଇଥିଲେ ମଧ୍ୟ ଏହା ଉପରେ କୌଣସି ପଦକ୍ଷେପ ନିଆଯାଇନାହିଁ। ଯଥାଶିଘ୍ର ଏହି କାମକୁ ତ୍ୱରାନିତ କରିବାପାଇଁ ସାଂସଦ ନିବେଦନ କରିଥିଲେ। ଖୁବ୍ ଶୀଘ୍ର ଏଦିଗରେ କାମ କରାଯିବ ବୋଲି ରାଜସ୍ୱ ପରିସଦ ସଭ୍ୟ ପ୍ରତିଶ୍ରୁତି ଦେଇଛନ୍ତି।
