ନୂଆଦିଲ୍ଲୀ: ଉତ୍ତର ପୂର୍ବାଞ୍ଚଳ ବିକାଶ ମନ୍ତ୍ରଣାଳୟର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ଗୁରୁବାର ଜାମ୍ମୁ କାଶ୍ମୀର ଗସ୍ତ କରିବେ। ଜାମ୍ମୁ କାଶ୍ମୀରରେ ଆରମ୍ଭ କରାଯିବାକୁ ଥିବା ନୂଆ ସଂସ୍କାର ଓ ନିୟମାବଳୀଗୁଡ଼ିକର ପଦ୍ଧତିକୁ ଅନୁଧ୍ୟାନ କରିବା ଏହି ଗସ୍ତର ମୂଳ ଲକ୍ଷ୍ୟ ବୋଲି ଏକ ସରକାରୀ ଇସ୍ତାହାରରେ କୁହାଯାଇଛି। ଏଇ ନିକଟରେ ଉତ୍ତର ପୂର୍ବାଞ୍ଚଳ ବିକାଶ ମନ୍ତ୍ରୀ ଜିତେନ୍ଦ୍ର ସିଂହଙ୍କ ଅଧ୍ୟକ୍ଷତାରେ ଏକ ବୈଠକ ବସି ଏହି ଗସ୍ତ ସଂକ୍ରାନ୍ତରେ ଆଲୋଚନା ହୋଇଥିଲା।
ଏହି ଗସ୍ତ ସମୟରେ ଜାମ୍ମୁ କାଶ୍ମୀରର ଲୋକମାନଙ୍କ ପାଇଁ ସ୍ଥାୟୀ ଜିବିକା ନିର୍ବାହନ, ମହିଳାମାନଙ୍କୁ କ୍ଷମତାପନ୍ନ କରିବା ଓ ସଂପ୍ରଦାୟ ଭିତ୍ତିକ ଯୋଜନା ଉପରେ ମୁଖ୍ୟତ ଆଲୋକପାତ କରାଯିବ। ଉତ୍ତର ପୂର୍ବାଞ୍ଚଳ ଓ ଜାମ୍ମୁ କାଶ୍ମୀରର କୃଷକ ଏବଂ ହସ୍ତଶିଳ୍ପିମାନଙ୍କ ବିଷୟ ବାହାରେ ଜଣାଇବା ପାଇଁ କାର୍ଯ୍ୟକ୍ରମ, ସ୍ଥାନୀୟ ଉତ୍ପାଦିତ ସାମଗ୍ରୀଗୁଡ଼ିକ ପାଇଁ ସୋରୁମ୍ ସ୍ଥାପନ, ଗୋଷ୍ଠୀ ଭିତ୍ତିକ ପ୍ରାକୃତିକ ସମ୍ବଳ ପରିଚାଳନା ଓ ସାଂସ୍କୃତିକ କାର୍ଯ୍ୟକ୍ରମ ଆଦାନପ୍ରଦାନ ପ୍ରତି ମଧ୍ୟ ଆଲୋକପାତ କରାଯିବ।
