ଭୁବନେଶ୍ୱର: ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଅବସରପ୍ରାପ୍ତ ଫରେଷ୍ଟ ରେଞ୍ଜ ଅଧିକାରୀ ଅଭୟ କୁମାର ଜେନାଙ୍କୁ ଭିଜିଲାନ୍ସ ଗିରଫ କରିଛି। ଚଢଉ ସମୟରେ ତାଙ୍କର ସ୍ଥାବର ଓ ଅସ୍ଥାବର ସମ୍ପତ୍ତିର ପରିମାଣ ୪ କୋଟି ୩୭ଲକ୍ଷ ୭୯ ହଜାର ୯୫୦ ଟଙ୍କା ଆକଳନ କରାଯାଇଥିଲା। ମାତ୍ର ଯାଞ୍ଚ ପ୍ରକ୍ରିୟା ଶେଷରେ ଏହାର ପରିମାଣ ୪ କୋଟି ୬୨ଲକ୍ଷ ୯୨ ହଜାର ୧୬୫ଟଙ୍କା ଆକଳନ କରିଛି ଭିଜିଲାନ୍ସ । ଚଢ଼ଉ କରିଥିବା ଅଧିକାରୀମାନେ ଶ୍ରୀ ଜେନାଙ୍କ ସମ୍ପତ୍ତି ଦେଖି ତାଜୁବ ହୋଇଛନ୍ତି । ତାଙ୍କର ଜୀବନକାଳର ମୋଟ ଆୟଠାରୁ ଜବତ ସମ୍ପତ୍ତି ୫୦୦% ଅଧିକ ବୋଲି ଭିଜିଲାନ୍ସ ବିଭାଗ ସୂଚନା ଦେଇଛି ।
ଶ୍ରୀ ଜେନାଙ୍କର ଭୁବନେଶ୍ବରରେ ତିନିମହଲା ଓ କଟକରେ ଦୁଇମହଲା କୋଠା, ଭୁବନେଶ୍ବର, ବାରଙ୍ଗ ଓ ଜଟଣୀରେ ୯ଟି ପ୍ଲଟ, ବିଭିନ୍ନ ବ୍ୟାଙ୍କରେ ଜମା ଆକାରରେ ୫୬ଲକ୍ଷ ୮ହଜାର ୪୭୩ଟଙ୍କା, ଦୁଇଟି କାର, ଗୋଟିଏ ଦୁଇଚକିଆ ଯାନ, ସୁନା ଓ ରୂପା ଅଳଙ୍କାର, ନଗଦ ଟଙ୍କା ସମେତ ଦାମୀ ଗୃହୋପକରଣ ଥିବା ଜଣାପଡିଥିଲା। ୨୦୦୦ ମସିହା ଜାନୁୟାରୀରୁ ୨୦୨୦ ମାର୍ଚ୍ଚ ୩୧ ତାରିଖ ମଧ୍ୟରେ ତାଙ୍କର ସ୍ଥାବର ଓ ଅସ୍ଥାବର ସମ୍ପତ୍ତିର ମୂଲ୍ୟ ଆକଳନ କରାଯାଇଥିଲା।
