ଭୁବନେଶ୍ୱର : ବଙ୍ଗୋପସାଗରରେ ସୃଷ୍ଟି ହୋଇଥିବା ବାତ୍ୟା ଅମ୍ଫନ ବର୍ତ୍ତମାନ ମହାବାତ୍ୟାର ରୂପ ନେଇସାରିଛି। ସମୁଦ୍ରରେ ଅତି ଭୟାନକ ରୂପ ଧାରଣ କରିସାରିଛି ବାତ୍ୟା ‘ଅମ୍ଫନ’ । ମହାବାତ୍ୟାର ରୂପ ଧାରଣ କରିଥିବା ବାତ୍ୟା ଏବେ ଉପକୂଳ ମୁହାଁ ହୋଇଛି । ପଶ୍ଚିମବଙ୍ଗର ସୁନ୍ଦରବନ ଇଲାକାରେ ଏହା ସ୍ଥଳଭାଗରେ ମାଡ଼ ହେବବୋଲି ପୂର୍ବାନୁମାନ କରାଯାଇଛି । ଓଡିଶାର ୪ ଜିଲାରରେ ବାତ୍ୟାର ପ୍ରଭାବ ରହିବ ବୋଲି ପାଣିପାଗ ସୂଚନା ଦେବାପରେ ରାଜ୍ୟ ସରକାର ଅତ୍ୟନ୍ତ ସତର୍କତାର ସହ ପଦକ୍ଷେପ ଗ୍ରହଣ କରିଛନ୍ତି । ବାତ୍ୟାରେ ପ୍ରଭାବିତ ହେବାକୁ ଥିବା ୪ ଜିଲ୍ଲାରେ ବାତ୍ୟା ମୁକାବିଲା ପାଇଁ ୪ ବରିଷ୍ଠ ଆଇଏଏସଙ୍କୁ ସ୍ୱତନ୍ତ୍ର ଦାୟିତ୍ୱ ଦିଆଯାଇଛି ।
ବାଲେଶ୍ୱର ପାଇଁ ମଧୁସୂଦନ ପାଢ଼ୀ, ଭଦ୍ରକ ପାଇଁ ସୁଶୀଲ ଲୋହାନୀ, କେନ୍ଦ୍ରାପଡ଼ା ପାଇଁ ହେମନ୍ତ ଶର୍ମା ଓ ଜଗତସିଂହପୁର ପାଇଁ ଶାଶ୍ୱତ ମିଶ୍ରଙ୍କୁ ଦାୟିତ୍ୱ ଦିଆଯାଇଛି । ଏହି ବରିଷ୍ଠ ଆଇଏଏସ ଅଧିକାରୀମାନେ ସେହି ସବୁ ଜିଲ୍ଲାରେ ବାତ୍ୟା ପରିଚାଳନାକୁ ତଦାରଖ କରିବେ । ଅପରପକ୍ଷରେ ସମ୍ଭାବ୍ୟ ବାତ୍ୟାକୁ ଆଖି ଆଗରେ ରଖି ସ୍ୱତନ୍ତ୍ର ରିଲିଫ କମିଶନରଙ୍କ ପକ୍ଷରୁ ମଧ୍ୟ ପଦକ୍ଷେପ ଗ୍ରହଣ କରାଯାଇଛି । ଲୋକଙ୍କୁ ସ୍ଥାନାନ୍ତରଣ ଓ ରିଲିଫ ବଣ୍ଟନ ନେଇ ପଦକ୍ଷେପ ମଧ୍ୟ ନିଆଯାଉଛି ।
