ସମ୍ବଲପୁର : ଜିଲା ଅବକାରୀ ବିଭାଗ ପକ୍ଷରୁ ଶୀତଳଷଷ୍ଠୀ ଯାତ୍ରାକୁ ଧ୍ୟାନରେ ରଖି ନିଶାଦ୍ରବ୍ୟର ବେଆଇନ କାରବାର ଉପରେ ଅଙ୍କୁଶ ଲଗାଇବା ପାଇଁ ଅଭିଯାନ ଜାରି ରହିଛି। ମୋଟ ୩ଟି ସ୍ଥାନରେ ଚଢଉ କରାଯାଇ ମୋଟ ୬୫୨ କଫ ସିରପ ବୋତଲ ଜବତ କରିଛି ଅବକାରୀ ବିଭାଗ। ରବିବାର କରାଯାଇଥିବା ଚଢ଼ଉ ସମୟରେ ପେନସନପଡା ନିବାସୀ ମହମ୍ମଦ ଜାହିର (୨୨) ଓ ମାୟାବଗିଚା ନିବାସୀ ସୋନୁ ସାହୁ (୨୫)ଙ୍କୁ ଗିରଫ କରିବା ସହ ସମୁଦାୟ ୫୦୦ ବୋତଲ କଫସିରପ ଜବତ କରିଛି। ଏନେଇ ଅବକାରୀ ବିଭାଗ ପକ୍ଷରୁ ଏକ ମାମଲା ରୁଜୁ କରି ଅଭିଯୁକ୍ତ ମାନଙ୍କୁ ଗିରଫ କରାଯାଇଛି।
ସେହିଭଳି ରବିବାର ଅନ୍ୟ ଏକ ଚଢ଼ଉ ମୁଦିପଡା ପାଣିଟାଙ୍କି ପଡା ଅଞ୍ଚଳରେ କରାଯାଇଥିଲା। ଚଢ଼ଉ ସମୟରେ ମୀନା ନାୟକ ନାମକ ଜଣେ ୩୦ ବର୍ଷିୟ ମହିଳାଙ୍କ ନିକଟରୁ ବେଆଇନ ଭାବରେ ରଖାଯାଇଥିବା ୨୨ଟି ନିଶା କଫ ସିରପ ବୋତଲ ଜବତ ହୋଇଥିଲା। ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରାଯାଇଛି ବୋଲି ଅବକାରୀ ବିଭାଗ ପକ୍ଷରୁ ସୂଚନାଦିଆଯାଇଛି। ସେହିପରି ଶନିବାର ଅବକାରୀ ବିଭାଗ ପକ୍ଷରୁ ଟାଉନ ଥାନା ଅନ୍ତର୍ଗତ ହୀରାକୁଦ କଲୋନୀ ଅଞ୍ଚଳରେ ଚଢ଼ଉ ସମୟରେ ରୁକିୟା ବେଗମ ନାମକ ଜଣେ ମହିଳାଙ୍କ ନିକଟରୁ ୧୩୦ ବୋତଲ ନିଶା କଫ ସିରପ ବେଆଇନ ଭାବରେ ରଖାଯାଇଥିବା ସମୟରେ ଜବତ କରାଯାଇଛି। ଏଥିସହ ମହିଳା ଜଣକ ବେଆଇନ ଭାବରେ ଏହି କଫସିରପ ଗୁଡିକୁ ଏକ ସ୍କୁଟି ଜରିଆରେ ଚାଲାଣ କରୁଥିବାରୁ ଉକ୍ତ ଗାଡିକୁ ମଧ୍ୟ ଜବତ କରାଯାଇଛି। ଏ ନେଇ ଏକ ମାମଲା ରୁଜୁ କରି ଅଭିଯୁକ୍ତ ମହିଳାଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି । ଫଳରେ ୨ ଦିନ ମଧ୍ୟରେ ୩ଟି ସ୍ଥାନରେ ଚଢ଼ଉ କରି ପୁଲିସ ସମୁଦାୟ ୬୫୨ଟି କଫ ସିରପ ବୋତଲ ଜବତ କରିବା ସହିତ ୨ଜଣ ଯୁବକ ଓ ୨ଜଣ ମହିଳାଙ୍କୁ ଅବକାରୀ ବିଭାଗ ଗିରଫ କରିଛି।
Comments are closed.