ଭବାନୀପାଟଣା: ଜୟପାଟଣା ବ୍ଲକ ଅଁଳାଭଟା ପଂଚାୟତର ଟିଙ୍ଗୋପଖାନ ଗାଁରେ ଝାଡାବାନ୍ତିରେ ଆକ୍ରାନ୍ତଙ୍କ ସଂଖ୍ୟା ୩୧ ରେ ପହଁଚିଛି। ପରିସ୍ଥିତିର ଅନୁଧ୍ୟାନ ପାଇଁ ବୁଧବାର ଜିଲ୍ଲାପାଳ ପି. ଅନ୍ୱେଷା ରେଡ୍ଡୀ ଜୟପାଟଣା ଡାକ୍ତରଖାନାକୁ ଯାଇ ରୋଗୀ ଙ୍କ ସ୍ବାସ୍ଥ୍ୟ ଅବସ୍ଥା ପଚାରି ବୁଝିଛନ୍ତି। ସିଡ଼ିଏମଓ ଡଃ ସୁଚେତା ପାଣି ଟିଙ୍ଗୋପଖାନ ଗାଁକୁ ଯାଇ ଅସ୍ଥାୟୀ ଶିବିର ପରିଦର୍ଶନ କରିବା ସହିତ ପରିସ୍ଥିତି ର ଅନୁଧ୍ୟାନ କରିଛନ୍ତି। ଅନ୍ୟପଟେ ଗାଁରେ ଝାଡାବାନ୍ତିରୁ ରକ୍ଷା ପାଇବା ପାଇଁ ଗାଁ ଲୋକେ ଦେବଦେବୀଙ୍କୁ ପୂଜା କରିଥିବା ଦେଖିବାକୁ ମିଳିଛି। ଗାଁ ଲୋକଙ୍କୁ ରୋଗ ବୈରାଗରୁ ରକ୍ଷା କରିବାକୁ ଗ୍ରାମଦେବୀଙ୍କୁ ସେମାନେ ପାରମ୍ପରିକ ଭାବେ ପୂଜାର୍ଚ୍ଚନା କରିଛନ୍ତି।
ଉଲ୍ଲେଖଯୋଗ୍ୟ, ଗତ ପ୍ରାୟ ସପ୍ତାହେ ଧରି ଅଁଳାଭଟା ପଂଚାୟତ ଓ ଏହା ଅଧୀନ ଟିଙ୍ଗୋପଖାନ ଗାଁରେ ଝାଡାବାନ୍ତିରେ ବହୁଲୋକ ଆକ୍ରାନ୍ତ ହେଲେଣି। ସେମାନଙ୍କ ମଧ୍ୟରୁ ୨ ଜଣ ଏସଆରଏମ ଭେଷଜ ମହାବିଦ୍ୟାଳୟ ଅନ୍ତର୍ଗତ ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି ହେଇଛନ୍ତି। ଟିଙ୍ଗୋପଖାନ ଗାଁରେ ଅସ୍ୱାସ୍ଥ୍ୟକର ପରିବେଶ, ଗାଁ ରାସ୍ତାରେ ଅନବରତ ନର୍ଦ୍ଦମା ପାଣି ଚାଲିବା, ନଳକୂପ ନିକଟରେ ସନ୍ତସନ୍ତିଆ ପରିବେଶ ଝାଡାବାନ୍ତିର ମୁଖ୍ୟ କାରଣ ବୋଲି କୁହାଯାଉଛି।
