ନୂଆଦିଲ୍ଲୀ: ଏହା ଏକ ପରମ୍ପରା ଥିଲା ଯେ କୌଣସି ଆନ୍ତର୍ଜାତିକ କ୍ରୀଡ଼ା ଇଭେଣ୍ଟର ଉଦ୍ଘାଟନୀ ଉତ୍ସବରେ ଭାରତୀୟ ମହିଳା କ୍ରୀଡ଼ାବିତ୍ ଶାଢ଼ୀ ଓ ବ୍ଲେଜର ପିନ୍ଧି ମାର୍ଚ୍ଚପାଷ୍ଟରେ ଭାଗ ନେଇଥାଆନ୍ତି। ହେଲେ ଆସନ୍ତା ରାଜ୍ୟଗୋଷ୍ଠୀ କ୍ରୀଡ଼ାରେ ଏହି ପରମ୍ପରା ଭାଙ୍ଗିବାକୁ ଯାଉଛି। ଅଷ୍ଟ୍ରେଲିଆର ଗୋଲ୍ଡକୋଷ୍ଟରେ ଏପ୍ରିଲ ୪ରୁ ୧୫ ପର୍ଯ୍ୟନ୍ତ ଆୟୋଜନ ହେବାକୁ ଥିବା ୨୧ତମ ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ମହିଳା ପ୍ରତିଯୋଗୀ ଶାଢ଼ୀ ବଦଳରେ ପ୍ୟାଣ୍ଟ୍ ପିନ୍ଧି ମାର୍ଚ୍ଚପାଷ୍ଟରେ ଭାଗନେବେ। ପ୍ୟାଣ୍ଟ୍ ଉପରେ ସେମାନେ ଭାରତୀୟ ବ୍ଲେଜର ପିନ୍ଧିବେ ବୋଲି ଭାରତୀୟ ଅଲିମ୍ପିକ୍ ଆସୋସିଏସ୍ (ଆଇଓଏ) ଘୋଷଣା କରିଛି।
ଅର୍ଥାତ୍ ରାଜ୍ୟଗୋଷ୍ଠୀ କ୍ରୀଡ଼ାରେ ଭାରତୀୟ ପୁରୁଷ ଓ ମହିଳା ଆଥ୍ଲେଟ୍ ସମାନ ପ୍ରକାର ପୋଷାକ ପିନ୍ଧି ମାର୍ଚ୍ଚପାଷ୍ଟରେ ଭାଗନେବେ। ଶାଢ଼ୀ ଅପେକ୍ଷା ପ୍ୟାଣ୍ଟ୍ ପିନ୍ଧିବା ଦ୍ୱାରା ମହିଳା କ୍ରୀଡ଼ାବିତ୍ ମାର୍ଚ୍ଚପାଷ୍ଟରେ ଆରାମରେ ଚାଲିପାରିବେ ବୋଲି ଆଇଓଏ କ୍ରୀଡ଼ାବିତ୍ ପରିଷଦର ଅଧ୍ୟକ୍ଷ ମାଳବ ସ୍ରଫ୍ କହିବା ସହ ଏଥିପାଇଁ ସେ ଆଇଓଏ ସଭାପତି ନରିନ୍ଦର ବାତ୍ରାଙ୍କୁ ଧନ୍ୟବାଦ ଦେଇଛନ୍ତି।
