ସମାଜ ଡିଜିଟାଲ ଡେସ୍କ: ମା’ ଆଖିରେ ଲଙ୍କାଗୁଣ୍ଡ ପକାଇ ପୁଅକୁ ଅପହରଣ କରିନେଲେ ଦୁର୍ବୃତ୍ତ। ପୁଅକୁ ସ୍କୁଲରେ ଛାଡ଼ିବାକୁ ଯାଉଥିବାବେଳେ ଦୁର୍ବୃତ୍ତମାନେ ଏପରି କାଣ୍ଡ ଘଟାଇଛନ୍ତି। ଘଟଣାଟି ମଧ୍ୟପ୍ରଦେଶ ଗ୍ବାଲିଅର ସହରର ଜୈନ ମନ୍ଦିର ମୁଖ୍ୟ ରାସ୍ତାରେ ଗୁରୁବାର ସକାଳ ୬ଟାରେ ଏହି ଘଟଣା ଘଟିଛି। ଏ ନେଇ ଥାନାରେ ଅଭିଯୋଗ ହେବା ପରେ ପୁଲିସ ଅପହୃତ ଶିଶୁକୁ ଉଦ୍ଧାର କରିବା ଲାଗି ଜୋରଦାର ଉଦ୍ୟମ ଚଳାଇଛି। ପିଲାଟି ବିଷୟରେ ତଥ୍ୟ ପ୍ରଦାନ କଲେ ୩୦ ହଜାର ଟଙ୍କାର ପୁରସ୍କାର ଦିଆଯିବ ବୋଲି ମଧ୍ୟ ଘୋଷଣା କରାଯାଇଛି।
Gwalior businessman’s wife attacked with chilli powder, child kidnapped in broad daylight#MadhyaPradesh #Madhyapradeshnews #Kidnapping #Gwalior pic.twitter.com/S7XJ87wEHy
— Free Press Madhya Pradesh (@FreePressMP) February 13, 2025
ସୂଚନା ଅନୁସାରେ, ଗ୍ବାଲିଅର ସହରର ମୁରାରସ୍ଥିତ ସିପି କଲୋନୀରେ ରାହୁଲ ଗୁପ୍ତା ନାମକ ବ୍ୟବସାୟୀଙ୍କ ସ୍ତ୍ରୀ ତାଙ୍କ ଛୋଟ ପୁଅକୁ ସ୍କୁଲରେ ଛାଡ଼ିବା ଲାଗି ଘରୁ ବାହାରିଥିଲେ। ଘରଠାରୁ କିଛି ବାଟ ଆସିବା ପରେ ଏକ ଲାଲ୍ ରଙ୍ଗର ପଲସର ବାଇକରେ ୨ ଜଣ ଦୁର୍ବୃତ୍ତ ଆସି ସେମାନଙ୍କ ରାସ୍ତା ଅଟକାଇଥିଲେ। ପରେ ସେମାନେ ଲଙ୍କାଗୁଣ୍ଡ ମହିଳାଙ୍କ ଆଖିରେ ପକାଇ ପୁଅକୁ ଉଠାଇ ନେଇଥିଲେ। ଏହି ଅପହରଣର ସମ୍ପୂର୍ଣ୍ଣ ଦୃଶ୍ୟ ନିକଟରେ ଲାଗିଥିବା ଏକ ସିସିଟିଭି କ୍ୟାମେରାରେ କଏଦ ହୋଇଛି।
ଘଟଣା ପରେ ମହିଳା ଜଣକ ଚିତ୍କାର କରିଥିଲେ। ଫଳରେ ଆଖପାଖର ଲୋକମାନେ ଦୌଡ଼ି ଆସିଥିଲେ। ତୁରନ୍ତ ପୁଲିସକୁ ସୂଚନା ଦିଆଯାଇଥିଲା। ସ୍ପଷ୍ଟ ଦିବାଲୋକରେ ଏପରି ଅପହରଣ ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ଖେଳିଯାଇଛି।
