ନୂଆଦିଲ୍ଲୀ: ମହାରାଷ୍ଟ୍ରର କ୍ରିଷ୍ଣା ଓ ପଞ୍ଚଗଙ୍ଗା ନଦୀରେ ଜଳପତନ ହ୍ରାସ ପାଇଥିବାରୁ ବନ୍ୟା ଦ୍ୱାରା ସବୁଠାରୁ ଅଧିକ କ୍ଷତିଗ୍ରସ୍ତ ସାଙ୍ଗଲି ଓ କୋହ୍ଲାପୁର ଜିଲ୍ଲାରେ ପରିସ୍ଥିତି ଧୀରେ ଧୀରେ ସୁଧୁରୁଛି। ସେହି ଦୁଇଟିଯାକ ଜିଲ୍ଲାରେ ରିଲିଫ୍ ଓ ଉଦ୍ଧାର କାର୍ଯ୍ୟ ଜୋରଦାର କରାଯାଇଛି। ରାଜ୍ୟର ଜଣେ ବରିଷ୍ଠ ଅଧିକାରୀ କହିଛନ୍ତି, ବନ୍ୟା ଓ ବର୍ଷା ବିତ୍ପାତରେ ସାଙ୍ଗଲି, କୋହ୍ଲାପୁର, ସତରା, ପୁନେ ଓ ସୋଲାପୁର ଜିଲ୍ଲାରେ ଆଉ ତିନୋଟି ମୃତ ଦେହ ମିଳିଲା ପରେ ମୃତ୍ୟୁ ସଂଖ୍ୟା ୪୩କୁ ବୃଦ୍ଧି ପାଇଥିବା ବେଳେ ତିନି ଜଣ ଲୋକଙ୍କର ପତ୍ତା ମିଳୁନାହିଁ।
ଆସନ୍ତା କେଇଦିନ ଧରି ଉତ୍ତର ଓ ଦକ୍ଷିଣ ଗୋଆରେ ମୂଷଳଧାରାରେ ବର୍ଷା ହେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି। ସମୁଦ୍ରକୁ ନ ଯିବା ପାଇଁ ମତ୍ସ୍ୟଜୀବୀମାନଙ୍କୁ ପରାମର୍ଶ ଦିଆଯାଇଛି। ଆସନ୍ତା ଦୁଇଦିନ ଧରି ମହାରାଷ୍ଟ୍ର-ଗୋଆ ଉପକୂଳରେ ଘଣ୍ଟାକୁ ୪୫ରୁ ୫୫ କିଲୋମିଟର ବେଗରେ ପବନ ବହିବ ଏବଂ ବେଳେବେଳେ ଏହା ୬୫ କିଲୋମିଟରକୁ ବୃଦ୍ଧି ପାଇବାର ଆଶଙ୍କା ରହିଛି। କୋଙ୍କଣ ଓ ଗୋଆରେ ଆଜି ଓ ଆସନ୍ତାକାଲି ମୂଷଳଧାରାରେ ବର୍ଷା ହେବ। ଉତ୍ତର ପଶ୍ଚିମ ବଙ୍ଗୋପସାଗର ଓ ପଶ୍ଚିମବଙ୍ଗ-ବାଙ୍ଗଲାଦେଶ ଉପକୂଳରେ ସୃଷ୍ଟି ହୋଇଥିବା ଲଘୁଚାପର ପ୍ରଭାବରେ ଏହି ବର୍ଷା ହେବ ବୋଲି ଅନୁମାନ କରାଯାଇଛି। ଏହି ଲଘୁଚାପ ୪୮ ଘଣ୍ଟା ମଧ୍ୟରେ ପଶ୍ଚିମ-ଉତ୍ତରପଶ୍ଚିମ ଦିଗରେ ଗତି କରିବ।
କେରଳରେ ବର୍ଷା କମିଯିବାରୁ ରିଲିଫ୍ ଓ ଉଦ୍ଧାର କାର୍ଯ୍ୟ ଜୋରସୋରରେ ଚାଲିଛି। ସରକାରୀ ଭାବେ ରାଜ୍ୟରେ ୮୩ ଜଣ ଲୋକଙ୍କର ମୃତ୍ୟୁ ଘଟିଛି। ୨ ଲକ୍ଷ ୭୦ ହଜାର ଲୋକ ବିଭିନ୍ନ ରିଲିଫ୍ ଶିବିରରେ ଆଶ୍ରୟ ନେଇଛନ୍ତି। ରାଜ୍ୟର ୬ଟି ଜିଲ୍ଲାରେ ଅରେଞ୍ଜ୍ ସତର୍କତା ଜାରି କରାଯାଇଛି। ଆଜି ୯ଟି ଜିଲ୍ଲାର ଶିକ୍ଷାନୁଷ୍ଠାନଗୁଡ଼ିକ ବନ୍ଦ୍ ରହିଛି। କର୍ଣ୍ଣାଟକରେ ରିଲିଫ୍ ଓ ଉଦ୍ଧାର କାର୍ଯ୍ୟ ଜୋର୍ସୋରରେ ଚାଲିଛି। ୪୮ ଜଣଙ୍କର ମୃତ୍ୟୁ ଘଟିଥିଲାବେଳେ ୬ ଲକ୍ଷ ୭୩ ହଜାର ଲୋକ ବାସଚ୍ୟୁତ ହୋଇଛନ୍ତି।
