ଓ୍ୱାଟର ହିଟର୍‌ ବନ୍ଦ କରିବାକୁ ଭୁଲିଯାଇଥିଲେ ଜଳିଗଲା ବହୁତଳ ପ୍ରାସାଦ

ପୁନେ – ପୁନେରେ ଏକ ଅଭାବନୀୟ ଘଟଣା ଘଟିଯାଇଛି । ଏକ ଆପାର୍ଟମେଣ୍ଟରେ ରହୁଥିବା ଏକ ପରିବାର ପାଣି ଗରମ ହେବା ପାଇଁ ଲାଗିଥିବା ହିଟ୍‌କୁ ବନ୍ଦ ବା ଅଫ୍‌ କରିବା ପାଇଁ ଭୁଲିଯାଇଥିଲେ । ଏହାପରେ ସେଥିରୁ ନିଆଁ ବାହାରି ଆପାର୍ଟମେଣ୍ଟର ଅନେକ କୋଠରୀ ଜଳିଯାଇଛି । ପୁନେର ଜମ୍ବୁଲଓ୍ୱାଡି ରାସ୍ତାରେ ଥିବା ଏହି ଆପାର୍ଟମେଣ୍ଟର ୫ ମହଲାରେ ଥିବା ପରିବାରର ଲୋକମାନେ ପାଣି ଗରମ କରିବା ପାଇଁ ଓ୍ୱାଟର ହିଟର୍‌ ବ୍ୟବହାର କରୁଥିଲେ ।

ମାତ୍ର ସେମାନେ ଏହାକୁ ବନ୍ଦ କରିବା ପାଇଁ ଭୁଲିଯାଇଥିଲେ । ଏହାପରେ ପାଣି ଗରମ ହୋଇ ବାଷ୍ପ ହୋଇଯାଇଥିଲା । ପରେ ଏଥିରୁ ପଞ୍ଚମ ମହଲାରେ ଥିବା କୋଠରୀରେ ନିଆଁ ଲାଗିଯାଇଥିଲା । ମାତ୍ର ପରିବାର ଲୋକ ଅନ୍ୟ ଏକ କୋଠରୀରେ ଥିବାରୁ ତୁରନ୍ତ ସେଠାରୁ ସୁରକ୍ଷିତ ସ୍ଥାନକୁ ଚାଲିଯାଇଥିଲେ । ଏହି ଅଗ୍ନିକାଣ୍ଡରେ କେହି ଆହତ ହୋଇ ନାହାନ୍ତି । ପରେ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲେ ।

ପ୍ରାଥମିକ ତଦନ୍ତ ପରେ ଓ୍ୱାଟର ହିଟରରୁ ନିଆଁ ବାହାରିଥିବା ଜଣା ପଡିଥିଲା । ପରିବାରର କେହି ପାଣି ଗରମ କରିବା ପାଇଁ ଓ୍ୱାଟର ହିଟର୍‌ ବ୍ୟବହାର କରୁଥିବା ବେଳେ ଏହାକୁ ସ୍ୱିଚ୍‌ ଅଫ୍‌ କରିବା ପାଇଁ ଭୁଲିଯାଇଥିଲେ । ଏଥିଯୋଗୁଁ ଏତେ ବଡ ଦୁର୍ଘଟଣା ଘଟିଯାଇଥିଲା ।