ଉନାଓ : ‘ଜୟ ଶ୍ରୀ ରାମ’ ସ୍ଲୋଗାନ୍କୁ ନେଇ ପୁନର୍ବାର ବିବାଦ ସୃଷ୍ଟି ହୋଇଛି। ଉତ୍ତରପ୍ରଦେଶର ଉନାଓସ୍ଥିତ ଏକ ମଦ୍ରାସାର ଛାତ୍ରମାନେ ‘ଜୟ ଶ୍ରୀରାମ’ କହିବାକୁ ମନା କରିବାରୁ ସେମାନଙ୍କୁ କିଛି ଯୁବକ ନିସ୍ତୁକ ମାଡ଼ମାରିଥିବା ଅଭିଯୋଗ ହୋଇଛି। ସ୍ଥାନୀୟ ଜାମା ମସଜିଦ୍ରେ ଗୁରୁବାର ଏହି ଘଟିଛି ଏହି ଘଟଣା।
ମସ୍ଜିଦ ଇମାମଙ୍କ ଅଭିଯୋଗ ଅନୁଯାୟୀ ଛାତ୍ରମାନେ ମଦ୍ରାସା ନିକଟରେ ଖେଳୁଥିବାବେଳେ ବଜରଙ୍ଗ ଦଳର ୪ କର୍ମୀ ଏହି ଆକ୍ରମଣ କରିଛନ୍ତି। ସେମାନେ ପ୍ରଥମେ ପିଲାଙ୍କ ସହ କ୍ରିକେଟକୁ ନେଇ ଯୁକ୍ତିତର୍କ କରିଥିଲେ। ପରେ ସେମାନଙ୍କୁ ‘ଜୟ ଶ୍ରୀରାମ’ ଧ୍ବନି ଦେବାକୁ ବାଧ୍ୟ କରିଥିଲେ। ଏଥିରେ ରାଜି ନ ହେବାରୁ ଆକ୍ରମଣକାରୀ ତିନି ଜଣଙ୍କୁ ମାଡ଼ମାରିବା ସହ ପୋଷାକପତ୍ର ଚିରିଦେଇଥିଲେ ଓ ସାଇକଲ ଭାଙ୍ଗି ଦେଇଥିଲେ। ମାଡ଼ଖାଇଥିବା ସମସ୍ତ ଛାତ୍ର ନାବାଳକ ବୋଲି ସେ ଦର୍ଶାଇଛନ୍ତି। ଏହି ଘଟଣା ପରେ ପୁଲିସ ମଦ୍ରାସାରେ ପହଞ୍ଚି ତଦନ୍ତ ଚଳାଇଛନ୍ତି। ତିନି ଜଣ ଆକ୍ରମଣକାରୀଙ୍କୁ ଚିହ୍ନଟ କରାଯାଇଛି। ବଜରଙ୍ଗ ଦଳର ଫେସ୍ବୁକ୍ ଏକାଉଣ୍ଟରୁ ସେମାନେ ଏହାର ସଦସ୍ୟ ବୋଲି ପ୍ରମାଣ ମିଳିଛି। ପୁଲିସ ଏହି ଘଟଣାରେ ଜଣକୁ ଗିରଫ କରିଛି। ଜୁଲାଇ ୪ରେ ଏଭଳି ଏକ ଘଟଣାରେ ଜଣେ ଅଟୋଚାଳକ ମହମ୍ମଦ ଆତିବଙ୍କୁ କିଛି ଲୋକ ମାଡ଼ମାରିଥିଲେ। କାନପୁରରେ ମଧ୍ୟ ତାଜ ମହମ୍ମଦ ନାମକ ଯୁବକଙ୍କ ଉପରେ ସମାନ କାରଣରୁ ଆକ୍ରମଣ ହୋଇଥିଲା। ଏଭଳି ଏକାଧିକ ଘଟଣା ଉତ୍ତରପ୍ରଦେଶରେ ଘଟୁଥିଲାବେଳେ ରାଜ୍ୟ ବାହାରେ ମଧ୍ୟ ଏହା ବ୍ୟାପିବାରେ ଲାଗିଛି।
