ରେଙ୍ଗାଲିକ୍ୟାମ୍ପ: ବରଗଡ଼ ଜିଲ୍ଲା ଅତାବିରା ଥାନା ଅନ୍ତର୍ଗତ ହୀରାକୁଦ ଡାଇକ ତଳେ ବୁର୍ଲା ଭୀମସାରର ଡାକ୍ତରୀ ଛାତ୍ରଙ୍କୁ ଛୁରି ଦେଖାଇ ମୋବାଇଲ ଲୁଟ୍ କରିବା ଘଟଣାରେ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରିଛି।
ଡାକ୍ତରୀ ଛାତ୍ର ଜଳଖିଆ ଖାଉଥିବା ସମୟରେ ହଠାତ୍ ଦୁଇ ଜଣ ଦୁର୍ବୃତ୍ତ ଏକ ସ୍କୁଟିରେ ଆସି ତାଙ୍କୁ ଛୁରି ଦେଖାଇ ୨ଟି ମୋବାଇଲ ଲୁଟି ନେଇ ଫେରାର ହୋଇଯାଇଥିଲେ। ଏ ନେଇ ସେ ସ୍ଥାନୀୟ ଫାଣ୍ଡିରେ ଅଭିଯୋଗ କରିଥିଲେ। ଫାଣ୍ଡି ଅଧିକାରୀ ଗଣେଶ ବାରିକ୍ ଓ ଅତାବିରା ଥାନା ଅଧିକାରୀ ପ୍ରକାଶ କର୍ଣ୍ଣ ଦୁର୍ବୃତ୍ତ ମାନଙ୍କୁ ଧରିବା ପାଇଁ ଯୋଜନା ପ୍ରସ୍ତୁତ କରିଥିଲେ। ଶେଷରେ ସମ୍ବଲପୁର ଧନୁପାଲିର ଶୁଭମ୍ କୁସୁମ(୨୨) ଓ ନିଖିଲ ବେହେରା (୨୧)ଙ୍କୁ ଗିରଫ କରିଥିଲେ। ସେମାନଙ୍କ ପାଖରୁ ଦେଢ଼ ଲକ୍ଷ ଟଙ୍କାର ଦୁଇଟି ମୋବାଇଲ, ଗୋଟିଏ ସ୍କୁଟି, ଛୁରୀ ଓ ନଗଦ ୬୩୦ ଟଙ୍କା ଜବତ କରାଯାଇଛି।
