ନୂଆଦିଲ୍ଲୀ: ମଧ୍ୟପ୍ରଦେଶର ଗ୍ବାଲିଅର ଅନ୍ତର୍ଗତ ବିର୍ଲା ନଗର ଷ୍ଟେଶନ ନିକଟରେ ଗୁରୁବାର ବିଳମ୍ବିତ ରାତିରେ ଏକ ଟ୍ରେନ ଦୁର୍ଘଟଣାଗ୍ରସ୍ତ ହୋଇଛି। ଭୋପାଳ ଏକ୍ସପ୍ରେସ ନାମରେ ଜଣାଶୁଣା ଶାନ-ଏ-ଭୋପାଳ ଏକ୍ସପ୍ରେସ ଏକ ମାଲବାହୀ ଟ୍ରେନକୁ ଧକ୍କା ଦେବାରୁ ଅଳ୍ପ କେତେଜଣ ଯାତ୍ରୀ ଆହତ ହୋଇଥିବା ସୂଚନା ମିଳିଛି। ଆହତମାନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି।
ବିର୍ଲାନଗର ଷ୍ଟେଶନ ନିକଟରେ ଏକ ମାଲବାହୀ ଟ୍ରେନର କେତେକ ବଗି ଲାଇନଚ୍ୟୁତ ହୋଇପଡ଼ିବା ପରେ ସେଗୁଡ଼ିକ ଟ୍ରାକ୍ ଉପରେ ରହିଥିଲା। ରାତି ପ୍ରାୟ ୩ଟା ୧୫ରେ ଭୋପାଳ ଏକ୍ସପ୍ରେସ୍ଟି ଟ୍ରାକରେ ଯିବା ବେଳେ ଲାଇନଚ୍ୟୁତ ବଗିଗୁଡ଼ିକ ସହ ଧକ୍କା ହୋଇଥିଲା। ଘଟଣାରେ କାହାର ମୃତ୍ୟୁ ଘଟିଥିବା ନେଇ ସୂଚନା ମିଳିନାହିଁ। ଦୁର୍ଘଟଣା ପରେ ଦିଲ୍ଲୀରୁ ଦକ୍ଷିଣ ଭାରତକୁ ଯୋଡୁଥିବା ରେଳପଥକୁ ସମ୍ପୂର୍ଣ୍ଣ ଭାବେ ବନ୍ଦ କରିଦିଆଯାଇଛି। ରେଲୱେ ଟ୍ରାକକୁ ମରାମତି କରାଯିବା ପାଇଁ ଜୋରସୋରରେ କାର୍ଯ୍ୟ ଚାଲିଥିବା ରେଲୱେର ଜଣେ ଅଧିକାରୀ କହିଛନ୍ତି।
