ଭୁବନେଶ୍ୱର : ସମ୍ଭାବ୍ୟ ‘ତିତ୍ଲି’ବାତ୍ୟାକୁ ଦୃଷ୍ଟିରେ ରଖି ସ୍ୱାସ୍ଥ୍ୟ ବିଭାଗ ପକ୍ଷରୁ ୧୩ ଜିଲାପାଳ ଓ ଜିଲା ସ୍ୱାସ୍ଥ୍ୟଅଧିକାରୀଙ୍କୁ ସଜାଗ ରହିବାପାଇଁ ସତର୍କ ସୂଚନା ଜାରି କରାଯାଇଛି। ଏନେଇ ସ୍ୱାସ୍ଥ୍ୟ ସଚିବ ଡା. ପ୍ରମୋଦ କୁମାର ମେହେର୍ଦା ମଙ୍ଗଳବାର ଦେଇଥିବା ପତ୍ରରେ ଉଲ୍ଲେଖ କରିଛନ୍ତି ଯେ ଆଜିଠାରୁ ୧୨ ତାରିଖ ମଧ୍ୟରେ ଗଞ୍ଜାମ, ଗଜପତି, ଖୋର୍ଦ୍ଧା, ପୁରୀ, ନୟାଗଡ, ଜଗତସିଂହପୁର, କେନ୍ଦ୍ରାପଡା, କଟକ, ଯାଜପୁର, ଭଦ୍ରକ, ବାଲେଶ୍ୱର, ବୌଦ୍ଧ ଓ କନ୍ଧମାଳ ପ୍ରଭୃତି ଜିଲାରେ ବାତ୍ୟା ହେବାର ସମ୍ଭାବନା ରହିଛି। ତେଣୁ ଏହିସବୁ ଜିଲାରେ ନୋଡାଲ ସେଣ୍ଟର ଚିହ୍ନଟ କରି ସ୍ୱତନ୍ତ୍ର ଭାବେ ନିୟନ୍ତ୍ରଣ କକ୍ଷ ଖୋଲ। ଏହିସବୁ ଜିଲା ଓ ବ୍ଲକରେ ଥିବା ସ୍ୱାସ୍ଥ୍ୟକେନ୍ଦ୍ରଗୁଡିକରେ ଜରୁରୀ ପରିସ୍ଥିତି ମୁକାବିଲା କରିବା ଲାଗି ଜେନେରେଟର ସହିତ ଜରୁରୀ ଔଷଧପତ୍ର ମହଜୁଦ୍ ରଖ। ତଳିଆ ଅଞ୍ଚଳଗୁଡିକ ପ୍ରତି ସ୍ୱତନ୍ତ୍ର ଧ୍ୟାନ ଦିଅ। ଜରୁରୀକାଳୀନ ପରିସ୍ଥିତିରେ କିଭଳି ରୋଗୀଙ୍କୁ ଆବଶ୍ୟକୀୟ ସ୍ୱାସ୍ଥ୍ୟସେବା ମିଳିବ ସେଥିପ୍ରତି ଗୁରୁତ୍ୱ ଦିଅ। ଆବଶ୍ୟକସ୍ଥଳେ ଗର୍ଭସ୍ଥଙ୍କୁ ମା’ ଗୃହ ତଥା ହସ୍ପିଟାଲକୁ ବୋହି ଆଣିବାପାଇଁ ଆମ୍ବୁଲାନ୍ସ ପ୍ରଭୃତି ବ୍ୟବସ୍ଥା କରିବାକୁ ଡା. ମେହେର୍ଦା ନିର୍ଦେଶ ଦେଇଛନ୍ତି।
