ମହାରାଷ୍ଟ୍ର: ନିଜର ୬ବର୍ଷ ଏବଂ ଦେଢ଼ ବର୍ଷର ୨ ଶିଶୁକନ୍ୟାଙ୍କ ବେକରେ ଦଉଡ଼ି ବାନ୍ଧି ଘରେ ଟାଙ୍ଗି ହତ୍ୟା କରିବା ପରେ ଏହାର ଫଟୋକୁ ନିଜ ପତ୍ନୀଙ୍କ ନିକଟକୁ ପଠାଇଛନ୍ତି ଜଣେ ଶିକ୍ଷକ। ଏହା ପରେ ସେ ନିଜେ ମଧ୍ୟ ଆତ୍ମହତ୍ୟା କରିଛନ୍ତି। ଏଭଳି ଏକ ଅଭାବନୀୟ ଘଟଣା ଘଟିଛି ମହାରାଷ୍ଟ୍ରର ନାଗପୁର ଅନ୍ତର୍ଗତର ବଲ୍ଲାରପୁର ଅଞ୍ଚଳରେ।
ପୁଲିସ ସୂଚନା ମୁତାବକ, ରିଶିକାନ୍ତ ସି. କୁଡୁପାଲ୍ଲି ଏକ କଲେଜରେ ଆଇଟିଆଇ ଶିକ୍ଷକ ଥିଲେ। ବିବାହ ପରେ ତାଙ୍କର ୨ଶିଶୁକନ୍ୟା ଥିଲେ। ୬ବର୍ଷର ଝିଅ ନାରାୟଣୀ ଏବଂ ଦେଢ଼ବର୍ଷର ଝିଅ କାର୍ତ୍ତିକି। ଏହା ପରେ ବି ତାଙ୍କ ପତ୍ନୀ ଅନ୍ୟ ଜଣେ ଯୁବକଙ୍କ ସହ ଲୁଚି ପଳାଇଥିଲେ। ଏହି ଘଟଣାକୁ ନେଇ ସେ ମାନସିକ ଦୁଶ୍ଚିନ୍ତାରେ ରହୁଥିଲେ। ସୋମବାର ରାତି ପ୍ରାୟ ୧ଟାରେ ସେ ନିଜ ୨ ଝିଅଙ୍କ ବେକକୁ ଦଉଡ଼ିରେ ବାନ୍ଧି ଟାଙ୍ଗି ଦେଇଥିଲେ। ପରେ ତାହା ଫଟୋ ଉଠାଇ ପତ୍ନୀଙ୍କ ନିକଟକୁ ପଠାଇବା ପରେ ନିଜେ ମଧ୍ୟ ଆତ୍ମହତ୍ୟା କରିଥିଲେ। ଘଟଣା ସମ୍ପର୍କରେ ରିଶିକାନ୍ତଙ୍କ ଭାଇ ଗୋପାଳ ସି. କୁଡୁପାଲ୍ଲି ସ୍ଥାନୀୟ ଥାନାରେ ଅଭିଯୋଗ କରିଛନ୍ତି। ପୁଲିସ ମୃତଦେହ ଜବତ କରି ଘଟଣାର ତଦନ୍ତ ଚଳାଇଛି।
