ନୂଆଦିଲ୍ଲୀ : ମୁଖ୍ୟ ନିର୍ବାଚନ ଆୟୁକ୍ତ ସୁନିଲ ଆରୋରା ରବିବାର ନିଜର ନୂଆ ଦାୟିତ୍ୱ ଗ୍ରହଣ କରିଛନ୍ତି। ଦାୟିତ୍ୱ ଗ୍ରହଣ ପରେ ସାମ୍ବାଦିକ ସମ୍ମିଳନୀରେ ଆରୋରା କହିଛନ୍ତି ଯେ ଆଗାମୀ ଲୋକସଭା ନିର୍ବାଚନକୁ ସ୍ୱଚ୍ଛ, ନିରପେକ୍ଷ ଓ ଅବାଧ କରିବା ତାଙ୍କର ସର୍ବପ୍ରଥମ ପ୍ରାଥମିକତା ରହିଛି। ଆସନ୍ତାବର୍ଷ ଦେଶରେ ଲୋକସଭା ନିର୍ବାଚନ ହେବାକୁ ଯାଉଥିବାବେଳେ ଏଥିପାଇଁ ନିର୍ବାଚନ ଆୟୋଗଙ୍କ ପ୍ରସ୍ତୁତି ଆରମ୍ଭ ହୋଇସାରିଥିବା ସେ କହିଛନ୍ତି। ନିର୍ବାଚନର ସମସ୍ତ ଦିଗ ଯଥା ଭୋଟର ପଞ୍ଜୀକରଣ, ଇଭିଏମ୍, ଭିଭିପିଏଟି, ପୋଷ୍ଟାଲ ବାଲାଟ ଭଳି ପ୍ରସଙ୍ଗକୁ ଗୁରୁତ୍ୱ ଦିଆଯାଉଛି। ସାଧାରଣ ନିର୍ବାଚନକୁ ସ୍ୱଚ୍ଛ ଓ ନିରପେକ୍ଷ କରିବା ଲାଗି ରାଜନୈତିକ ଦଳ, ଏନଜିଓ, ଗଣମାଧ୍ୟମ ଭଳି ବଡ ଅଂଶୀଦାରଙ୍କ ସହଯୋଗ କାମନା କରିଛନ୍ତି ଆରୋରା।
