କୋଣାର୍କ : ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ବିଶ୍ୱ ଐତିହ୍ୟ କୋଣାର୍କ ସୂର୍ଯ୍ୟମନ୍ଦିରକୁ ନେଇ ଦେଶ ଗର୍ବ ଅନୁଭବ କରୁଥିବାବେଳେ ଦିନକୁ ଦିନ ଏହାର ସୂକ୍ଷ୍ମ କାରୁକାର୍ଯ୍ୟ ଉଭାନ ହେବାରେ ଲାଗିଛି। ଭାରତୀୟ ସର୍ବେକ୍ଷଣ ସଂସ୍ଥା ଏଏସ୍ଆଇ କାରୁକାର୍ଯ୍ୟ ସମ୍ପନ୍ନ ପଥରକୁ ହଟାଇ ସାଦା ପଥର ବସାଉ ଥିବାବେଳେ ମନ୍ଦିରରୁ ବହୁ କାରୁକାର୍ଯ୍ୟ ଗାଏବ ହେବାରେ ଲାଗିଛି। ପର୍ଯ୍ୟଟକ ଏବଂ ସ୍ଥାନୀୟ ଲୋକଙ୍କ ମଧ୍ୟରେ ଏନେଇ ଅସନ୍ତୋଷ ଦେଖାଦେଇଛି।
ସୂର୍ଯ୍ୟ ମନ୍ଦିର ସୁରକ୍ଷା ଓ ସଂରକ୍ଷଣ ଦିଗରେ ଭାରତୀୟ ସର୍ବେକ୍ଷଣ ସଂସ୍ଥା ସଠିକ୍ ଭାବେ ଦାୟିତ୍ୱ ନିର୍ବାହ କରୁନଥିବା ଯୋଗୁଁ ମନ୍ଦିର ପ୍ରତି ବିପଦ ସୃଷ୍ଟି ହୋଇଛି। ବିଭିନ୍ନ ସମୟରେ ବିଭିନ୍ନ ବିଭାଗର ବରିଷ୍ଠ ପଦାଧିକାରୀ ଆସି ମନ୍ଦିର ଯାଞ୍ଚ କରୁଥିବାବେଳେ ସୁରକ୍ଷା ଦିଗରେ ଧ୍ୟାନ ଦିଆଯାଉନଥିବା କରାଯାଉନଥିବା ଅଭିଯୋଗ ହେଉଛି। ଦୁଇବର୍ଷ ତଳେ ଭାରତୀୟ କୋଠାବାଡ଼ି ନିୟନ୍ତ୍ରଣ ସଂସ୍ଥା ପକ୍ଷରୁ ଲେଜର ସର୍ବେକ୍ଷଣ କରାଯାଇଥିଲା। ଗତବର୍ଷ ବାଲି କାଢ଼ିବା ଲାଗି ପ୍ରକ୍ରିୟା ଆରମ୍ଭ ହୋଇଥିଲେ ମଧ୍ୟ ଦୀର୍ଘ ୬ ମାସ ଧରି ଏହି କାର୍ଯ୍ୟ ବନ୍ଦ ରହିଛି। ଗୋଟିଏ ପଟେ ମନ୍ଦିର ସୁରକ୍ଷିତ ଅଛି କି ନାହିଁ ସେ ସମ୍ପର୍କରେ ତଥ୍ୟ ପ୍ରଦାନ କରାଯାଉନାହିଁ। ଅପରପକ୍ଷେ ରାତି ଅଧିଆ ମନ୍ଦିରରୁ ନଷ୍ଟ ହୋଇଯାଇଥିବା କାରୁକାର୍ଯ୍ୟ ସମ୍ପନ୍ନ ପଥରକୁ କଢ଼ାଯାଇ ସାଦା ପଥର ବସାଯାଉଥିବା ଅଭିଯୋଗ ହେଉଛି। ଏନେଇ ଏଏସ୍ଆଇ କର୍ତ୍ତୃପକ୍ଷଙ୍କ ପକ୍ଷରୁ କୌଣସି ପ୍ରତିକ୍ରିୟା ମିଳିପାରିନାହିଁ। ଏହା ଉପରେ ରାଜ୍ୟ ସରକାର ଦୃଷ୍ଟି ଦେବାକୁ କୋଣାର୍କର ବିଭିନ୍ନ ସଂଗଠନ ପକ୍ଷରୁ ଦାବି ହୋଇଛି।
