ଭିଜିଲାନ୍ସର ପୁଣି ଏକ ଷ୍ଟ୍ରୋକ ; ବଡ଼ଗାଁ ସହକାରୀ ଯନ୍ତ୍ରୀଙ୍କ କାର୍ଯ୍ୟାଳୟ ଓ ବାସଗୃହରେ ଚଢ଼ାଉ, ୧କୋଟିରୁ ଉର୍ଦ୍ଧ୍ବ ଆୟବର୍ହିଭୂତ ସମ୍ପତ୍ତି ଠାବ

ସୁନ୍ଦରଗଡ଼/ବଡ଼ଗାଁ : ଗତ କିଛି ମାସ ହେବ ଭିଜିଲାନ୍ସ ବିଭାଗ ଗୋଟିଏ ପରେ ଗୋଟିଏ ଷ୍ଟ୍ରୋକ ମାରିବାରେ ଲାଗିଛି । କିଛି ଦିନ ପୂର୍ବରୁ ଶିକ୍ଷା ଅଧିକାରୀ ଓ କିରାଣିଙ୍କୁ ପଞ୍ଝା ମାରିବା ପରେ ଆଜି ପୁଣି ଆୟବର୍ହିଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ବଡ଼ଗାଁ ବ୍ଲକରେ ଅବସ୍ଥାପିତ ସହକାରୀ ଯନ୍ତ୍ରୀ ପର୍ଶୁରାମ ନାଏକଙ୍କ କାର୍ଯ୍ୟାଳୟ ଓ ବାସଗୃହରେ ଭିଜିଲାନ୍ସ ଚଢ଼ାଉ କରି ପ୍ରାୟ ୧କୋଟି ୩୫ଲକ୍ଷରୁ ଉର୍ଦ୍ଧ୍ବ ଟଙ୍କାର ସମ୍ପତ୍ତି ଠାବ କରି ତାଙ୍କୁ ପଚରାଉଚୁରା କରୁଥିବାର ଜଣାପଡ଼ିଛି । ବିଭାଗୀୟ ସୂତ୍ରରୁ ପ୍ରକାଶ, ବଡ଼ଗାଁ ବ୍ଲକରେ ଅବସ୍ଥାପିତ ଏହି ଯନ୍ତ୍ରୀ ୧୯୯୨ ମସିହାରୁ ସରକାରୀ କାର୍ଯ୍ୟ ଆରମ୍ଭ କରିଥିବା ବେଳେ ୨୦୧୩ ମସିହାରେ ସହକାରୀ ଯନ୍ତ୍ରୀ ପଦବୀକୁ ପଦୋନ୍ନତି ହୋଇଥିଲେ । ପରେ ସେ ୨୦୧୮ ମସିହାରୁ ବଡ଼ଗାଁ ବ୍ଲକରେ ସହକାରୀ ଯନ୍ତ୍ରୀ ଭାବେ ଅବସ୍ଥାପିତ ଥିଲେ । ରହଣି ସମୟରେ ସେ ବହୁ ବେଆଇନ ସମ୍ପତ୍ତି ଠୁଳ କରିବାର ସୂଚନା ପାଇବା ପରେ ବିଭାଗ ଭିଜିଲାନ୍ସ ଜଜ୍‍ଙ୍କ ସ୍ୱତନ୍ତ୍ର ୱାରେଣ୍ଟ ବଳରେ ତାଙ୍କ ବଡ଼ଗାଁ କାର୍ଯ୍ୟାଳୟ ଓ ସୁନ୍ଦରଗଡ଼ ରଙ୍ଗାଢିପାରେ ଥିବା ୩ତାଲା ବାସଗୃହ ଉପରେ ଖାନତଳାସୀ ଆରମ୍ଭ କରିଥିଲେ । ଖାନତଳାସୀ ସମୟରେ ଏହି ୩ତାଲା ବାସଗୃହ ବ୍ୟତୀତ ସୁନ୍ଦରଗଡ଼ ଓ ପିପଲିରେ ଦୁଇଟି ପ୍ଲଟ, ଗୋଟିଏ ଚାରି ଚକିଆ କାର, ଦୁଇଟି ବାଇକ, ବିଭିନ୍ନ ଜୀବନ ବୀମା ଓ ସଞ୍ଚୟ ଯୋଜନାରେ ଲକ୍ଷାଧିକ ଟଙ୍କା ରଖିବା, ବ୍ୟାଙ୍କ ଓ ପୋଷ୍ଟ ଅଫିସ ଜମା, ୧୩ଲକ୍ଷରୁ ଉର୍ଦ୍ଧ୍ବ ଟଙ୍କାର ସୁନା ଗହଣା, ଘରେ ଦାମିକିଆ ଆସବାପତ୍ର ସମେତ ନଗଦ ୨୬ହଜାର ୩ଶହ ଟଙ୍କା ଜବତ କରିଥିଲେ । ଶେଷ ଖବର ଲେଖା ହେଲା ବେଳକୁ ୧କୋଟି ୩୫ଲକ୍ଷ ୬୪ହଜାର ୯୫୧ ଟଙ୍କା ସମ୍ପତ୍ତି ଠାବ କରାଯାଇଥିଲା । ଭିଜିଲାନ୍ସ ଏସ.ପି ସୁବାଷ ଚନ୍ଦ୍ର ସ୍ୱାଇଁଙ୍କ ନିର୍ଦ୍ଦେଶକ୍ରମେ ଡି.ଏସ.ପି ବିରେନ୍ଦ୍ର କୁମାର ନାଏକଙ୍କ ନେତୃତ୍ୱରେ ଭିଜିଲାନ୍ସ ଟିମ ଚଢ଼ାଉ କରିଥିଲେ ।