ପୁନେ: ରୁଷିଆର କୋଭିଡ-୧୯ ଟିକା ସ୍ପୁଟନିକ ଭି ଭାରତରେ ଉତ୍ପାଦନ କରିବାକୁ ସେରମ୍ ଇନଷ୍ଟିଚ୍ୟୁଟ ଅଫ ଇଣ୍ଡିଆ (ଏସଆଇଆଇ) ଭାରତର ଔଷଧ ମହାନିୟନ୍ତ୍ରକ (ଡିସିଜିଆଇ) ନିକଟରେ ଆବେଦନ କରିଛି। ସରକାରୀ ସୂତ୍ରରୁ କୁହାଯାଇଛି ଯେ ପୁନେସ୍ଥିତ ଏସଆଇଆଇ ବୁଧବାର ଦିନ ଏଥିପାଇଁ ଆନୁଷ୍ଠାନିକ ଭାବରେ ଅନୁମୋଦନ ଲୋଡିଛି। ଏଥିସହିତ ସେରମ ଇନଷ୍ଟିଚ୍ୟୁଟ ଟେଷ୍ଟ ଆନାଲିସିସ ଏବଂ ପରୀକ୍ଷା ନିରୀକ୍ଷା ପାଇଁ ମଧ୍ୟ ଅନୁମତି ମାଗିଛି। ଏହି ଅନୁମତି ମିଳିଲେ ଏସଆଇଆଇ କ୍ଲନିକାଲ ଟ୍ରାଏଲ ଆରମ୍ଭ କରିବ। ତାହା ଯଦି ସଫଳ ହୁଏ ତେବେ ଏସଆଇଆଇ ସପ୍ତମ କମ୍ପାନୀ ଭାବରେ ସ୍ପୁଟନିକ ଭି ଟିକା ଉତ୍ପାଦନ କରିବ। ଏସଆଇଆଇ ପୂର୍ବରୁ କେନ୍ଦ୍ର ସରକାରଙ୍କୁ କହିଥିଲା ଯେ ଏହା ଜୁନରେ ୧୦ କୋଟି କୋଭିସିଲ୍ଡ ଟିକା ଉତ୍ପାଦନ ସହିତ ଯୋଗାଣ ପାଇଁ ସମର୍ଥ ହୋଇପାରିବ। ଏହା ନୋଭାଭାକ୍ସ ଟିକା ମଧ୍ୟ ଉତ୍ପାଦନ କରୁଛି ଏବଂ ସେଥିପାଇଁ ଆମେରିକାରୁ ନିୟାମକ ଅନୁମୋଦନକୁ ଅପେକ୍ଷା କରାଯାଇଛି। ସ୍ପୁଟନିକ ଭି ଟିକା ବିପଣନ କରୁଥିବା ରୁଷିଆର ଆରଡିଆଇଏଫ ସୋଭରେନ ୱେଲଥ ଫଣ୍ଡ୍ ଭାରତର ଛଅଟି ଅଗ୍ରଣୀ ଟିକା ଉତ୍ପାଦନକାରୀ କମ୍ପାନୀ ସହିତ ରାଜିନାମା କରିସାରିଛି। ସେଥିମଧ୍ୟରେ ଡ.ରେଡିସ୍ ଲାବୋରେଟୋରୀ, ଗ୍ଲାଣ୍ଡ ଫାର୍ମା, ହେଟେରୋ ବାୟୋଫାର୍ମା, ପାନାସିଆ ବାୟୋଟେକ, ଷ୍ଟେଲିସ ବାୟୋଫାର୍ମା ଏବଂ ଭିରଚୋ ବାୟୋଟେକ ଆଦି ରହିଛି। ଡିସିଜିଆଇ ଗତ ଏପ୍ରିଲରେ ସ୍ପୁଟନିକ ଭି ଟିକାକୁ ଜରୁରୀକାଳୀନ ବ୍ୟବହାର ନିମନ୍ତେ ଅନୁମତି ପ୍ରଦାନ କରିଥିଲେ। ଏହି ଟିକା ସଂପ୍ରତି ଭାରତରେ ଡ.ରେଡିସ ଲାବୋରେଟୋରୀରେ ତିଆରି କରାଯାଉଛି।
Comments are closed.