ଶୀତଳଷଷ୍ଠୀରେ ଦୁଲୁକିଲା ସମ୍ବଲପୁର ; ଯୁଗଳ ଦର୍ଶନ ଦେଲେ ଦେବଦମ୍ପତି

ସମ୍ବଲପୁର : ନାଚଗୀତରେ କମ୍ପୁଛି ସମ୍ବଲପୁର। ଦେବାଧିଦେବ ମହାଦେବ ଏବଂ ମାତା ପାର୍ବତୀ ବର୍ଣ୍ଣାଢ଼୍ୟ ଶୋଭାଯାତ୍ରାରେ ନଗର ପରିକ୍ରମା କରୁଛନ୍ତି। ଗୁରୁବାର ରାତିରେ ନନ୍ଦପଡ଼ାର ବମବରାଡ଼ ବାଲୁଙ୍କେଶ୍ବର ବାବା, ଝାଡୁଆପଡ଼ାର ଲୋକନାଥ ବାବା, ମୁଦିପଡ଼ାର ଜାଗେଶ୍ବର ବାବା, ବଡ଼ବଜାରର ଶୀତଳେଶ୍ବର ବାବା ଓ ଠାକୁରପଡ଼ାର ଗୁପ୍ତେଶ୍ବର ବାବା ମନ୍ଦିରରୁ ବାହାରି ଶ୍ରଦ୍ଧାଳୁଙ୍କୁ ଦର୍ଶନ ଦେଇଛନ୍ତି। ଶୋଭାଯାତ୍ରାରେ ସ୍ଥାନୀୟ ତଥା ରାଜ୍ୟ ଓ ରାଜ୍ୟ ବାହାରରୁ ଆସିଥିବା ପ୍ରାୟ ୧୦ ହଜାର କଳାକାର ସାମିଲ ହୋଇଛନ୍ତି। ଲୋକବାଦ୍ୟ, ଲୋକନୃତ୍ୟ, ରଥ ନାଚ, ପ୍ରଜ୍ଞାପନ ମେଢ଼ ତଥା ମହାଦେବ ଓ ପାର୍ବତୀଙ୍କ ଯୁଗଳ ପରଭା ସହ ଶୋଭାଯାତ୍ରା ରାତିତମାମ ଚାଲିଥିଲା। ଭୋରୁ ପୂର୍ବ ନିର୍ଦ୍ଧାରିତ ସ୍ଥାନରେ ଶୋଭାଯାତ୍ରା ଅଟକିଥିଲା। ଶୁକ୍ରବାର ୯ଟାରୁ ପୁଣି ଯାତ୍ରାରମ୍ଭ ହୋଇ ଅନୁମୋଦିତ ଯାତ୍ରାପଥ ଦେଇ ଅପରାହ୍ଣରେ ଦେବଦମ୍ପତି ମନ୍ଦିର ପ୍ରବେଶ କରିବା କାର୍ଯ୍ୟକ୍ରମ ରହିଛି।
ଗୁରୁବାର ବ୍ରାହ୍ମ ମୁହୂର୍ତ୍ତରେ ଦେବ ଦମ୍ପତିଙ୍କ ବିବାହ ପରେ ସକାଳେ କନ୍ୟାଳୟରେ ନବବିବାହିତ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥିଲେ। ପରେ ସ୍ବମନ୍ଦିର ଅଭିମୁଖେ ପ୍ରସ୍ଥାନ କରିଥିଲେ। ନଗର ପରିକ୍ରମା ଶୋଭାଯାତ୍ରା ହେଉଥିବା ୫ଟି ମନ୍ଦିର ବ୍ୟତୀତ ଅନ୍ୟ ସମସ୍ତ ଶିବାଳୟରେ ମନ୍ଦିର ପ୍ରବେଶ ହୋଇ ପୂଜାର୍ଚ୍ଚନା ଓ ଅାଳତି କରାଯାଇଥିଲା। ନନ୍ଦପଡ଼ା, ଝାଡ଼ୁଆପଡ଼ା, ମୁଦିପଡ଼ା, ବଡ଼ବଜାର ଓ ଠାକୁରପଡ଼ାର ଦେବଦମ୍ପତିଙ୍କୁ ସାଜସଜ୍ଜା କରି ପୁଣି ଗୁରୁବାର ରାତିରେ ଯୁଗଳ ଦର୍ଶନ ଶୋଭାଯାତ୍ରା ବାହାରିଥିଲା।

Comments are closed.