ସମାଜ ଡିଜିଟାଲ ଡେସ୍କ: ଟେଷ୍ଟ କ୍ରିକେଟରେ ପ୍ରଥମ ଶତକ ହାସଲ କରିଛନ୍ତି ଭାରତୀୟ ନବାଗତ ବ୍ୟାଟ୍ସମ୍ୟାନ ସର୍ଫରାଜ ଖାନ। ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଟେଷ୍ଟରେ ସେ ଏହି ସଫଳତା ହାସଲ କରିଛନ୍ତି। ସର୍ଫରାଜଙ୍କ ଶତକ ବଳରେ ଭାରତ ନ୍ୟୁଜିଲାଣ୍ଡ ବିପକ୍ଷରେ ୨ୟ ଇନିଂସରେ ବଡ଼ ସ୍କୋର କରିବା ଆଶା ରହିଛି। ୧୧୪ ରନରେ ସର୍ଫରାଜ ଅପରାଜିତ ରହିଛନ୍ତି।
ପ୍ରଥମ ଇନିଂସରେ ଭାରତ ୪୬ ରନରେ ଅଲଆଉଟ ହେବା ପରେ ନ୍ୟୁଜିଲାଣ୍ଡ ୪୦୨ ରନ କରିଥିଲା। ଜବାବରେ ଭାରତ ୨ୟ ପାଳିରେ ଭଲ ପ୍ରାରମ୍ଭ କରିଥିଲା। ଓପନିଂ ଯୋଡ଼ିରେ ଜୟସଓ୍ବାଲ(୩୫) ଏବଂ ରୋହିତ ଶର୍ମା(୫୨) ପ୍ରଥମ ଉଇକେଟରେ ୭୨ ରନ ସଂଗ୍ରହ କରିଥିଲେ। ଏହା ପରେ ବିରାଟ କୋହଲି ଏବଂ ସର୍ଫରାଜ ଖାନ ସ୍ଥିତି ସମ୍ଭାଳିଥିଲେ। ଖେଳର ୩ୟ ଦିବସରେ କୋହଲି ୭୦ ରନ କରି ଆଉଟ୍ ହୋଇଯିବା ପରେ ରୁଷଭ ପନ୍ତ ସର୍ଫରାଜଙ୍କ ସହିତ ମିଶି ଦଳର ସ୍କୋରକୁ ଆଗେଇନେବାରେ ସହାୟତା କରିଛନ୍ତି। ୪ର୍ଥ ଦିବସ ଖେଳ ଜାରି ରହିଥିବାବେଳେ ଭାରତ ପୂର୍ବାହ୍ନ ୧୦ଟା ୪୦ ସୁଦ୍ଧା ୩ ଉଇକେଟ ବିନିମୟରେ ୩୧୯ ରନ୍ ସଂଗ୍ରହ କରିଛି।
