କଳାପଥର(ବାଙ୍କୀ): ବାଙ୍କୀ ତହସିଲ ଅନ୍ତର୍ଗତ ଓସ୍ତିଆ ବାଲିଘାଟ ନିଲାମ ଦିଆଯାଇଛି। ତେବେ ନିଲାମମଧାରୀ ଏଠାରୁ ବାଲି ନ ଉଠାଇ ସୁବର୍ଣ୍ଣପୁରଠାରେ ମହାନଦୀ ବନ୍ଧ ପାର୍ଶ୍ୱରୁ ବାଲି ଉଠାଉଥିବା ନେଇ ଗ୍ରାମବାସୀଙ୍କ ପକ୍ଷରୁ ବହୁ ବାର ଅଭିଯୋଗ ହୋଇଥିଲା। ଖଣି କି ରାଜସ୍ୱ ବିଭାଗ କେହି ପଦକ୍ଷେପ ନେଇ ନଥିଲେ। ସମ୍ପୃକ୍ତ ଲିଜ୍ଧାରୀ ପ୍ରାୟ ୧୫୦୦ ବାଲିଟ୍ରିପ ବେଆଇନ ଭାବେ ଉତ୍ତୋଳନ କରି ଅନ୍ୟତ୍ର ପଡିଆରେ ମହଜୁଦ ରଖିଥିଲେ। ଏ ସମ୍ପର୍କରେ ଓସ୍ତିଆ ଗ୍ରାମବାସୀ ଜିଲାପାଳଙ୍କ ଜନ ଶୁଣାଣିରେ ଅଭିଯୋଗ କରିଥିଲେ। ଏଥିନେଇ ଗତ ୧୯/୭/୨୪ରିଖ ‘ସମାଜ’ରେ ‘ତହସିଲଦାର ଓ ଖଣି ବିଭାଗ କଟକଣା ମାନୁନି ଓସ୍ତିଆ ବାଲିଘାଟ’ ଶୀର୍ଷକ ଖବର ପ୍ରକାଶ ପରେ କଟକ ଅତିରିକ୍ତ ଜିଲାପାଳ(ରାଜସ୍ୱ ବିଭାଗ) ଉମାକାନ୍ତ ରାଜ ତୁରନ୍ତ ବେଆଇନ ଭାବେ ବାଲି ମହଜୁଦ ରଖିଥିବା ବାଲିକୁ ଜବତ କରି ସର୍ବ ସାଧାରଣରେ ନିଲାମ କରିବାକୁ ନିର୍ଦେଶ ଦେଇଥିଲେ। ନିର୍ଦେଶ ଅନୁଯାୟୀ ରାଜସ୍ୱ ନିରୀକ୍ଷକ, ସୁପରଭାଇଜର ଓ କର୍ମଚାରୀମାନେ ପଡିଆରେ ଗଦା ହୋଇଥିବା ବାଲିକୁ ଜବତ କରି ବାଙ୍କୀ ତହସିଲଦାର ଅଶେଷ କୁମାର ନାୟକ ସୂଚନା ଦେଇଛନ୍ତି। ତେବେ ସେଠାରେ ବେଆଇନ ଭାବେ ବାଲି ଉତୋଳନରେ ନିୟୋଜିତ ଥିବା ମେସିନକୁ ଜବତ କରିବାକୁ ଗ୍ରାମବାସୀ ଦାବି କରିଛନ୍ତି।
Comments are closed.