କିଭ୍ – ୟୁକ୍ରେନ୍ର ରାଜଧାନୀ କିଭ୍ ନିକଟରୁ ରୁଷ୍ ସୈନ୍ୟ ପଛକୁ ହଟିଥିବା କଥା ୟୁକ୍ରେନ୍ କହିଛି । ରୁଷ୍ ତାହାର ସେନା ବାହିନୀକୁ ପଛକୁ ହଟାଇଥିବା ୟୁକ୍ରେନ୍ର ରାଷ୍ଟ୍ରପତି ଜେଲେନ୍ସ୍କି କହିଛନ୍ତି । ରୁଷ୍ର ସୈନ୍ୟମାନେ ସେଠାରୁ ହଟିବା ପରେ ଲ୍ୟାଣ୍ଡମାଇନ୍ ସହଅନ୍ୟ ଅଫୁଟା ଗୋଳାବାରୁଦ ତଥା ବିସ୍ଫୋରକର ଭୟ ରହିଛି ବୋଲି ୟୁକ୍ରେନ୍ ପକ୍ଷରୁ କୁହାଯାଇଛି ।
ରୁଷ୍ର ସୈନ୍ୟ ପଛକୁ ହଟିଥିଲେ ମଧ୍ୟ ସେଠାରେ ଏକ ଭୟଙ୍କର ପରିସ୍ଥିତି ସୃଷ୍ଟ ହୋଇଥିବା କଥା କୁହାଯାଇଛି । ଏବେ ୟୁକ୍ରେନ୍ର ପୂର୍ବ ଅଞ୍ଚଳ ଉପରେ ରୁଷ୍ ଆକ୍ରମଣ ଜାରି ରଖିଛି। ଏଠାରେ ରୁଷୀୟ ଭାଷା ଭାଷୀ ଅଧିକ ରହୁଛନ୍ତି । ସେମାନେ ରୁଷ୍ର ସମର୍ଥନରେ ଦୀର୍ଘଦିନ ଧରି ୟୁକ୍ରେନ୍ ସରକାରଙ୍କ ସହ ଛାୟା ଯୁଦ୍ଧ କରି ଆସୁଥିଲେ।
ୟୁକ୍ରେନ୍ ଛାଡି ଚାଲିଯାଇଥିବା ପ୍ରାୟ ୪୦ ଲକ୍ଷ ନାଗରିକ ଖୁବଶୀଘ୍ର ଦେଶକୁ ଫେରି ଆସିବେ ବୋଲି ୟୁକ୍ରେନ ସରକାର ଆଶାବାଦୀ ଅଛନ୍ତି । ୟୁକ୍ରେନର ମାରିୟୁପୋଲ୍ରେ ଏବେ ବି ଯୁଦ୍ଧ ଲାଗି ରହିଛି । ସେଠାରେ ଏକ ଲକ୍ଷରୁ ଅଧିକ ଲୋକ ଫସି ରହିଛନ୍ତି । ସେଠାରେ ଖାଦ୍ୟ. ସହ ପିଇବା ପାଣି ଏବଂ ଔଷଧର ଅଭାବ ଦେଖା ଦେଇଥିବା କଥା ବିଭିନ୍ନ ସମାଜସେବୀ ସଂଗଠନ ପ୍ରକାଶକରିଛନ୍ତି । ମାରିଆପୁଲ୍ରେ ପ୍ରାୟ ଏକ ମାସ ଧରି ଯୁଦ୍ଧ ଚାଲିଛି । ଏହି ସହରକୁ ଦଖଲ କରିବା ପରେ ରୁଷ୍ ଏବଂ କ୍ରିମିଆମଧ୍ୟରେ ଯୋଗାଯୋଗ ସହଜ ହୋଇଯିବ ।
ମାରିଆପୁଲ୍ରୁ ସାଧାରଣଲୋକଙ୍କୁ ସୁରକ୍ଷିତ ସ୍ଥାନକୁ ନେବା ପାଇଁ ରୁଷ୍ ରାଜି ହୋଇଥିବା କଥା ଜେଲେନ୍ସ୍କିଙ୍କର ଜଣେ ପରାମର୍ଶଦାତା କହିଛନ୍ତି । ରୁଷ୍ର ବେଲଗୋରୋଡ ସହରରେ ଥିବା ଏକ ତୈଳ ଭଣ୍ଡାର ଉପରେ ହେଲିକପ୍ଟରେ ଗୋଳା ବର୍ଷଣ କରାଯାଇଛି । ୟୁକ୍ରେନ ସୀମାରୁ ମାତ୍ର ୨୫ କିଲୋମିଟର ଦୂରରେ ଥିବା ଅଏଲ୍ ଡିପୋ ଉପରେ ଏହି ଆକ୍ରମଣ କରାଯାଇଛି । ୟୁକ୍ରେନ ଏହି ଆକ୍ରମଣ କରିଥିବା ରୁଷ୍ କହିଥିବା ବେଳେ ୟୁକ୍ରେନ ସରକାର ଏହା ଉପରେ କୌଣସି ପ୍ରତିକ୍ରିୟା ଦେଇ ନାହାନ୍ତି । ଏହା ରୁଷ୍ ସୀମାରେ ପ୍ରବେଶ କରି ୟୁକ୍ରେନ୍ ପକ୍ଷରୁ ପ୍ରଥମ ଆକ୍ରମଣ ବୋଲି କୁହାଯାଉଛି ।
