ମୁମ୍ବଇ: ବଲିଉଡ଼ ଅଭିନେତା ଅଜୟ ଦେବଗନ ଓଟିଟି ପ୍ଲାଟଫର୍ମରେ ପାଦ ଥାପିବାକୁ ସମ୍ପୂର୍ଣ୍ଣ ପ୍ରସ୍ତୁତ। ନିଜ ଆଗାମୀ ୱେବ ସିରିଜ୍ ‘ରୁଦ୍ର: ଦି ଏଜ୍ ଅଫ୍ ଡାର୍କନେସ୍’ ସହ ଇଣ୍ଟରନେଟରେ ହଇଚଇ ସୃଷ୍ଟି କରିବାକୁ ଆସୁଛନ୍ତି ଅଜୟ। ଏହି ସିରିଜ୍ର ଟ୍ରେଲର ସୋମବାର ରିଲିଜ୍ ହୋଇଛି। ଟ୍ରେଲରରେ ଅଜୟ ଜବରଦସ୍ତ ଅବତାରରେ ନଜର ଆସିଛନ୍ତି। ଏଥିରେ ଅଜୟ ରୁଦ୍ରବୀର ସିଂହ ଓରଫ୍ ରୁଦ୍ର ନାମକ ପୁଲିସ ଅଧିକାରୀ ଭୂମିକାରେ ଅଭିନୟ କରିଛନ୍ତି।
‘ରୁଦ୍ର’ ସିରିଜର ଟ୍ରେଲରରେ ଅଜୟଙ୍କ ଜବରଦସ୍ତ ଆକ୍ସନ ଦୃଶ୍ୟ ଦେଖିବାକୁ ମିଳିବ। ଟ୍ରେଲରରେ ଅଭିନେତ୍ରୀ ରାଶି ଖନ୍ନା ଅଜୟଙ୍କ ସହ ମାଇଣ୍ଡ ଗେମ୍ ଖେଳୁଥିବା ଦେଖିବାକୁ ମିଳିଛି। ଏଥିସହ ଅଜୟ ଜଣେ କୁଖ୍ୟାତ ଅପରାଧୀକୁ ଖୋଜୁଛନ୍ତି। ଏହି ଅପରାଧୀର ସନ୍ଧାନରେ ଅଜୟ ଅନେକ ଜିନିଷ ଦେଖିବାକୁ ପାଇଛନ୍ତି ଓ ଅନେକ ଲୋକଙ୍କ ଜୀବନ ମଧ୍ୟ ଯାଉଛି। ଏହାସହିତ ତାଙ୍କ ବ୍ୟକ୍ତିଗତ ଜୀବନର ଅସୁବିଧା ବଢିବାରେ ଲାଗିଛି।
ଏହି ସିରିଜ୍ରେ ଅଜୟ ଓ ରାଶି ଖନ୍ନାଙ୍କ ବ୍ୟତୀତ ଈଶା ଦେଓଲ, ଅତୁଲ କୁଲକର୍ଣ୍ଣି, ଅଶ୍ବିନୀ କଲସେକର, ବିକ୍ରମ ସିଂହ ଚୌହାନ, ଆଶୀଷ ବିଦ୍ୟାର୍ଥୀ ପ୍ରମୁଖ ନଜର ଆସିବେ। ଅଜୟ ଦେବଗନଙ୍କ ୬ ଏପିସୋଡ଼ର ଏହି ସିରିଜ୍ ମାର୍ଚ୍ଚ ୪ ତାରିଖରେ ଡିଜ୍ନୀ ପ୍ଲସ ହଟଷ୍ଟାରରେ ରିଲିଜ୍ ହେବ।
