ରେଙ୍ଗାଲି: ସମ୍ବଲପୁର ଜିଲ୍ଲାର ରେଙ୍ଗାଲି ବ୍ଲକ ଲଇଡା ପଞ୍ଚାୟତ ଦେଇ କୁଚିଣ୍ଡାକୁ ସଂଯୋଗ କରୁଥିବା ପୂର୍ତ୍ତ ବିଭାଗ ରାସ୍ତାରୁ ଦଳପତପାଲି ଦେଇ ଚାନ୍ଦୁଟିକ୍ରା-ବୈଜାପାଲିକୁ ସଂଯୋଗ କରୁଥିବା ପଞ୍ଚାୟତ ରାସ୍ତା ଦୀର୍ଘ ବର୍ଷ ହେଲା ଅପନ୍ତରା ହୋଇ ପଡିରହିଥିଲା। ଏହାର ମରାମତି କରାଯାଇ ଗମନାଗମନ ଉପଯୋଗୀ କରିବାକୁ ଜନସାଧାରଣ ଅନେକ ଥର ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ। କିନ୍ତୁ ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଗଲା ନାହିଁ। ଫଳରେ ପ୍ରଶାସନ ଉପରେ ଭରସା ନକରି ଦଳପତପାଲି ଏବଂ ଚାନ୍ଦୁଟିକ୍ରା ବୈଜାପାଲି ଗ୍ରାମବାସୀ ସାମୂହିକ ଭାବରେ ପ୍ରତି ଘରୁ ଚାନ୍ଦା କରି ରାସ୍ତା ମରାମତି କରି ଏକ ଉଦାହରଣ ସୃଷ୍ଟି କରିଛନ୍ତି। ଜେସିବି ମେସିନ୍ ଏବଂ ଟ୍ରାକ୍ଟର ଲଗାଇ ମୋରମ୍ ଆଣି ସମସ୍ତେ ଶ୍ରମଦାନ କରି ରାସ୍ତା ମରାମତି କରିଛନ୍ତି।
ସୂଚିତ ଯେ, ଏହି ରାସ୍ତାକୁ ପ୍ରଧାନମନ୍ତ୍ରୀ ସଡକ ଯୋଜନାରେ ସାମିଲ କରାଯିବାକୁ ଦୀର୍ଘ ବର୍ଷ ହେଲା ଦାବୀ ହୋଇ ଆସୁଛି।
