ସମାଜ ଡିଜିଟାଲ ଡେସ୍କ: ଆଉ କିଛି ସମୟ ପରେ ଖୋଲିବ ଶ୍ରୀମନ୍ଦିର ରତ୍ନଭଣ୍ଡାର। ଏଥିପାଇଁ ମନ୍ଦିରରେ ଆସି ପହଞ୍ଚିଛି ୬ଟି ସିନ୍ଦୁକ। ମୋଟ ୧୫ଟି ସିନ୍ଦୁକ ବରାଦ ହୋଇଥିବାବେଳେ ଆଉ ୯ଟି ସିନ୍ଦୁକ ଖୁବଶୀଘ୍ର ଆସି ପହଞ୍ଚିବ। ରତ୍ନଭଣ୍ଡାରରୁ ଯେଉଁସବୁ ଅଳଙ୍କାର ବାହାରିବ ତାହାକୁ ସିନ୍ଦୁକରେ ରଖାଯିବ। ଏହି ସିନ୍ଦୁକ ଶାଗୁଆନ କାଠରେ ତିଆରି ହୋଇଥିବାବେଳେ ତାହା ଉପରେ ପିତ୍ତଳ ଛାଉଣୀ ଲଗାଯାଇଛି। ୨୦ ଜଣ କାରିଗର ୪୮ ଘଣ୍ଟା ମଧ୍ୟରେ ଏସବୁ ସିନ୍ଦୁକ ତିଆରି କରିଛନ୍ତି।
ଅନ୍ୟପଟେ ରତ୍ନଭଣ୍ଡାର ଖୋଲାଯିବା ଲାଗି ଅପରାହ୍ନ ୧ଟା ୨୮ ମିନିଟକୁ ଶୁଭ ମୁହୂର୍ତ୍ତ ଧାର୍ଯ୍ୟ ହୋଇଛି। ତଦନୁଯାୟୀ, ରତ୍ନଭଣ୍ଡାରରେ ପ୍ରବେଶ କରିବାକୁ ଥିବା ୧୧ ଜଣିଆ ଟିମ ମନ୍ଦିର ଭିତରେ ପ୍ରବେଶ କରିଛନ୍ତି। ଜଷ୍ଟିସ ବିଶ୍ଵନାଥ ରଥଙ୍କ ନେତୃତ୍ଵରେ ଟିମ ମନ୍ଦିର ଭିତରକୁ ଯାଇଛନ୍ତି। ଅନ୍ୟ ସଦସ୍ୟଙ୍କ ମଧ୍ୟରେ ରହିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢ଼ୀ, ଜିଲ୍ଲାପାଳ, ଏଏସଆଇ ଅଧୀକ୍ଷକ, ରତ୍ନଭଣ୍ଡାର ସବ୍ କମିଟିର ଜଣେ ସଦସ୍ୟ, ଉଚ୍ଚସ୍ତରୀୟ କମିଟିର ଦୁଇ ଜଣ ସଦସ୍ୟ, ଗଜପତି ମହାରାଜାଙ୍କ ପ୍ରତିନିଧି, ପାଟ୍ଟଯୋଶୀ ମହାପାତ୍ର, ଭଣ୍ଡାର ମେକାପ, ଚଢାଉ କରଣ ଓ ଦେଉଳ କରଣ ରତ୍ନଭଣ୍ଡାର ଭିତରକୁ ଯିବେ। ଆଜି ଅଳଙ୍କାର ଗଣତି ହେବନି, କେବଳ ରତ୍ନଭଣ୍ଡାର ଖୋଲାଯିବ।
