ନୂଆଦିଲ୍ଲୀ: ଚୀନ ସହ ବିବାଦକୁ ନେଇ କେନ୍ଦ୍ର ସରକାରଙ୍କୁ କଡ଼ା ସମାଲୋଚନା କରିଥିବା କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ବିଜେପି ଏବଂ ଆରଏସଏସକୁ ଟାର୍ଗେଟ୍ କରିଛନ୍ତି। ସେ କହିଛନ୍ତି, ବିଜେପି ଏବଂ ଆରଏଏସ ଭାରତରେ ଫେସବୁକ୍ ଏବଂ ହ୍ବାଟ୍ସଆପ୍କୁ ନିଜ ନିୟନ୍ତ୍ରଣରେ ରଖିଛନ୍ତି। ସେମାନେ ଏହି ୨ଟି ସୋସିଆଲ ମିଡିଆ ଜରିଆରେ ମିଥ୍ୟା ଖବର ଏବଂ ଘୃଣାର ପ୍ରଚାର କରୁଛନ୍ତି। ଏହା ସହିତ ନିର୍ବାଚନ ସମୟରେ ମତଦାତାଙ୍କୁ ପ୍ରଭାବିତ କରିବା ଲାଗି ଉଭୟ ଆରଏସଏସ ଓ ବିଜେପି ଏହି ୨ଟି ସୋସିଆଲ ମିଡିଆ ପ୍ଲାଟ୍ଫର୍ମକୁ ବ୍ୟବହାର କରିଆସୁଛନ୍ତି ବୋଲି ରାହୁଲ କହିଛନ୍ତି।
ସୂଚନାଯୋଗ୍ୟ, ରବିବାର ସକାଳେ ରାହୁଲ ଚୀନ ସହ ସୀମା ବିବାଦ ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ସମାଲୋଚନା କରିଥିଲେ। ସେ ଟ୍ବିଟ୍ କରି କହିଥିଲେ ଯେ, ପ୍ରଧାନମନ୍ତ୍ରୀ ମୋଦୀଙ୍କୁ ଛାଡ଼ି ଭାରତୀୟ ସେନାର ଶକ୍ତି ଏବଂ ବୀରତା ଉପରେ ସମସ୍ତ ଦେଶବାସୀଙ୍କର ଭରସା ରହିଛି। ପ୍ରଧାନମନ୍ତ୍ରୀଙ୍କ ସାହସ ନ ଥିବା ଯୋଗୁ ଚୀନ ଆମ ଜାଗାକୁ କବ୍ଜା କରିଛି ବୋଲି ରାହୁଲ କହିଥିଲେ।
