ପାଟଣା : ପାଟଣା ବ୍ଲକର ୫ଟି ପ୍ରାଥମିକ ବିଦ୍ୟାଳୟ ଓ ୭ଟି ଉଚ୍ଚ ପ୍ରାଥମିକ ବିଦ୍ୟାଳୟକୁ ବନ୍ଦ କରାଯିବାର ନିଷ୍ପତ୍ତିକୁ ୧୧ଟି ଗ୍ରାମର ଗ୍ରାମବାସୀ ବିରୋଧ କରି ଜିଲ୍ଲାପାଳ, ଡିପିସି ଓ ବ୍ଲକ ଶିକ୍ଷା ଅଧିକାରୀଙ୍କୁ ଦାବୀପତ୍ର ଦେଇ ବିଦ୍ୟାଳୟ ବନ୍ଦ ନ କରିବାକୁ ଲେଖିଛନ୍ତି।
ଖବର ଅନୁଯାୟୀ, ପାଟଣା ବ୍ଲକର ଅଁଳାଡିହା ପ୍ରାଥମିକ ବିଦ୍ୟାଳୟରେ ମାତ୍ର ୧୫ ଜଣ ଛାତ୍ରଛାତ୍ରୀ ୨୦୧୯-୨୦ ଶିକ୍ଷା ବର୍ଷରେ ନାମ ଲେଖାଇଥିବା ବେଳେ ଦେଓଗାଁ ପ୍ରାଥମିକ ବିଦ୍ୟାଳୟରେ ୧୪ ଜଣ, ଧାରୁଆପଡା ପ୍ରାଥମିକ ବିଦ୍ୟାଳୟରେ ୧୪ ଜଣ, ଜହ୍ନେଇପଶି ପ୍ରାଥମିକ ବିଦ୍ୟାଳୟରେ ୧୩ ଜଣ ଓ ପଦ୍ମକେଶରପୁର ପ୍ରାଥମିକ ବିଦ୍ୟାଳୟରେ ୧୫ ଜଣ ନାମ ଲେଖାଇଥିବାରୁ ଏହି ୫ଟି ଯାକ ପ୍ରାଥମିକ ବିଦ୍ୟାଳୟ ବନ୍ଦ କରାଯିବା ନିଷ୍ପତ୍ତିକୁ ସଂପୃକ୍ତ ଗ୍ରାମବାସୀ ବିରୋଧ କରିଛନ୍ତି। ସେହିପରି ପ୍ରଥମରୁ ଅଷ୍ଟମ ଶ୍ରେଣୀ ଯାଏ ଥିବା ଉଚ୍ଚ ପ୍ରାଥମିକ ବିଦ୍ୟାଳୟମାନଙ୍କ ମଧ୍ୟରେ ବଡଗମ୍ଭାରୀଆରେ ଷଷ୍ଠରୁ ଅଷ୍ଟମରେ ମାତ୍ର ୧୧ ଜଣ, ଡାବରଚୁଆରେ ୧୦ ଜଣ, ଝାଲିଆପଡାରେ ୧୨ ଜଣ, ଖୁଣ୍ଟାପଡାରେ ୧୦ ଜଣ, କିଆପଡାରେ ୮ ଜଣ ପଦ୍ମପୁରରେ ୧୩ ଜଣ ଓ ରାଇକଳା ଉଚ୍ଚ ପ୍ରାଥମିକ ବିଦ୍ୟାଳୟରେ ଷଷ୍ଠରୁ ଅଷ୍ଟମ ଶ୍ରେଣୀରେ ମାତ୍ର ୧୪ ଜଣ ଛାତ୍ରଛାତ୍ରୀ ୨୦୧୯-୨୦ ଶିକ୍ଷା ବର୍ଷରେ ନାମ ଲେଖାଇଛନ୍ତି। ତେଣୁ ଉପରୋକ୍ତ ସାତଟି ଯାକ ଉଚ୍ଚ ପ୍ରାଥମିକ ବିଦ୍ୟାଳୟରୁ ଷଷ୍ଠରୁ ଅଷ୍ଟମ ଶ୍ରେଣୀ ଯାଏ ଉଠାଇ ଦେଇ ପୁନର୍ବାର ଏହିସବୁ ବିଦ୍ୟାଳୟଗୁଡିକ ପ୍ରାଥମିକ ବିଦ୍ୟାଳୟ ଭାବେ କାର୍ୟ୍ୟକାରୀ କରିବାକୁ ସରକାରୀ ସ୍ତରରେ ନିଷ୍ପତ୍ତି ନିଆଯାଇଛି। ସମସ୍ତ ଗ୍ରାମବାସୀ ବିଦ୍ୟାଳୟ ବନ୍ଦ ନ କରିବାକୁ ଦାବୀ ଜଣାଇଥିବା ବେଳେ ଖୁଣ୍ଟାପଡାରୁ କୌଣସି ଅଭିଯୋଗ ନଥିବା ଜଣାପଡ଼ିଛି।
Comments are closed.