ନୂଆଦିଲ୍ଲୀ: ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦୀ କଲ୍ ଡ୍ରପ୍ ଭଳି ସମସ୍ୟାର ସମ୍ମୁଖୀନ ହୋଇଥିବା ଅଭିଯୋଗ କରିଛନ୍ତି । ଖୋଦ୍ ପ୍ରଧାନମନ୍ତ୍ରୀ ଏନେଇ ଦୂର ସଂଚାର ନିୟାମକ(ଟ୍ରାଇ)କୁ ଅବଗତ କରାଇବା ସହ କଲ ଡ୍ରପ୍ ଭଳି ସମସ୍ୟାର ସମାଧାନ ନିମନ୍ତେ ତ୍ବରିତ ପଦକ୍ଷେପ ନେବାକୁ ନିଦେର୍ଶ ଦେଇଛନ୍ତି । ଉଲ୍ଲେଖଯୋଗ୍ୟ ଯେ, କଲ୍ ଡ୍ରପ୍ ଭଳି ସମସ୍ୟା ନେଇ ଉପଭୋକ୍ତାମାନେ ଅଭିଯୋଗ କରିବା ପରେ ଟ୍ରାଇ ବଡ ପଦକ୍ଷେପ ନେଇଥିଲା । କଲ ଡ୍ରପ୍ ସମସ୍ୟାରେ ଟେଲିକମ୍ କମ୍ପାନୀ କୌଣସି ଅର୍ଥ(ବାଲାନ୍ସ) କାଟି ପାରିବେ ନାହିଁ ବୋଲି ନିଦେର୍ଶନାମା ଜାରି ହୋଇଥିଲା । ତେବେ ପ୍ରଧାନମନ୍ତ୍ରୀ ଏଭଳି ସମସ୍ୟାର ସମ୍ମୁଖୀନ ହେବା ପରେ ଏଥିରେ କୌଣସି ସୁଧାର ଆସୁ ନଥିବା ସ୍ପଷ୍ଟ ପରିଲକ୍ଷିତ ହୋଇଛି।
ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଦୂରସଂଚାର ସଚ୍ଚିବ ଅରୁଣା ସୁନ୍ଦରରାଜନଙ୍କ ସହ ଆଲୋଚନା କରିଛନ୍ତି । ଦିଲ୍ଲୀ ବିମାନ ବନ୍ଦରରେ ପ୍ରାୟତଃ କଲ୍ ଡ୍ରପ୍ ସମସ୍ୟା ଦେଖା ଦେଉଥିବା ଜଣେ ଅଧିକାରୀଙ୍କ ନାମ ଗୋପନ ରଖି ପ୍ରକାଶ କରିଛନ୍ତି । ପ୍ରଧାନ ମନ୍ତ୍ରୀ ନରେନ୍ଦ୍ର ମୋଦୀ ମଧ୍ୟ ଦିଲ୍ଲୀ ଇନ୍ଦିରାଗାନ୍ଧି ଅନ୍ତର୍ଜାତୀୟ ବିମାନ ବନ୍ଦର (ଆଇଜିଆଇଏ)ରେ କଲ୍ ଡ୍ରପ୍ ସମସ୍ୟାରେ ପଡିଥିଲେ । ବିମାନ ବନ୍ଦରରୁ ମୋଦୀ ପ୍ରଶାସନିକ ଅଧିକାରୀ ଓ ସଚିବ ନିକଟକୁ ଅନେକ ଥର କଲ୍ କରିଥିଲେ ମଧ୍ୟ ତାହା ଲାଗି ନଥିଲା ।
ପ୍ରକାଶଯୋଗ୍ୟ ଯେ ୩ଟି କଲ୍ ଡ୍ରପ୍ ହେଲେ ୧ଟଙ୍କା ଜୋରିମନା ବ୍ୟବସ୍ଥା ରହିଛି । ଏହାର ପର୍ଯ୍ୟବେକ୍ଷଣ ପାଇଁ ଟ୍ରାଇ ପକ୍ଷରୁ ‘କ୍ୱାଲିଟି ଅଫ ସର୍ଭିସ୍’ ଗୁଣାବତ୍ତା ସେବା ମାନଦଣ୍ଡ ବ୍ୟବସ୍ଥା ଲାଗୁ କରାଯାଇଛି । କଲ୍ ଡ୍ରପ ଓ ନେଟୱାର୍କ ସମସ୍ୟା ପାଇଁ ଅର୍ଥଦଣ୍ଡ ବ୍ୟବସ୍ଥା କରାଯାଇଛି । ଦୁଇ ପ୍ରତିଶତରୁ ଅଧିକ କଲ୍ ଡ୍ରପ୍ ହେଲେ ଟେଲିକମ୍ କମ୍ପାନୀ ଗୁଡିକୁ ୫ଲକ୍ଷ ଟଙ୍କା ପର୍ୟ୍ୟନ୍ତ ଜୋରିମନା ଦେବାକୁ ନିୟମ ରହିଛି । ତେବେ ଅତ୍ୟାଧିକ ଜ୍ଞାନ କୌଶଳ(ଲାଟେଷ୍ଟ ଟେକ୍ନିକ୍) ଦ୍ବାରା ଏହି ସମସ୍ୟା ସମାଧାନ କରିବାକୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି ।
