ଜଲନ୍ଧର: ଆମେରିକା ପରେ ଏବେ ୟୁକେରୁ ନିର୍ବାସନ ପାଇଁ ପ୍ରସ୍ତୁତି ଚାଲିଛି। ୟୁକେର ଲେବର ସରକାର ବେଆଇନ ପ୍ରବାସୀମାନଙ୍କ ବିରୋଧରେ ଏକ ବିଶାଳ ଅଭିଯାନ ଆରମ୍ଭ କରିଛନ୍ତି। ଏହି ଅଭିଯାନରେ ଭାରତୀୟ ରେଷ୍ଟୁରାଣ୍ଟ, ନେଲ ବାର୍, ତେଜରାତି ଦୋକାନ ଏବଂ କାର୍ ଓ୍ବାଶ୍ ପରି ଛୋଟ ବ୍ୟବସାୟ ଉପରେ ବିଶେଷ ଧ୍ୟାନ ଦିଆଯାଇଛି।
ନିକଟରେ ୮୨୮ ସ୍ଥାନରେ ଚଢାଉ କରାଯାଇଥିଲା। ଏଥିରେ ୬୦୯ ଜଣଙ୍କୁ ଗିରଫ କରାଯାଇଥିଲା। ଗିରଫ ହୋଇଥିବା ଅଧିକାଂଶ ଲୋକ ପଞ୍ଜାବୀ, ଯେଉଁମାନେ ଅଧ୍ୟୟନ କିମ୍ବା ଟୁରିଷ୍ଟ ଭିସା ନେଇ ୟୁକେ ଯାଇଥିଲେ। ସେମାନଙ୍କର ଭିସା ଅବଧି ଶେଷ ହେବା ପରେ ମଧ୍ୟ ସେମାନେ ବେଆଇନ ଭାବେ ବ୍ରିଟେନରେ ରହିଥିଲେ।
ଉତ୍ତର ଇଂଲଣ୍ଡର ହମ୍ବରସାଇଡରେ ଥିବା ଏକ ଭାରତୀୟ ରେଷ୍ଟୁରାଣ୍ଟ ଉପରେ ଚଢାଉ କରାଯାଇ ୭ ଜଣଙ୍କୁ ଗିରଫ କରାଯାଇଛି, ସେମାନଙ୍କ ମଧ୍ୟରୁ ୪ ଜଣଙ୍କୁ ଜେଲ୍ ପଠାଇ ଦିଆଯାଇଛି। ଲେବର ସରକାର କ୍ଷମତାକୁ ଆସିବା ପରେ ପ୍ରାୟ ୧୯,୦୦୦ ବିଦେଶୀ ଅପରାଧୀ ଏବଂ ବେଆଇନ ପ୍ରବାସୀଙ୍କୁ ଦେଶରୁ ବିତାଡିତ କରାଯାଇଛି। ସେମାନଙ୍କ ମଧ୍ୟରୁ ଅଧିକାଂଶ ପଞ୍ଜାବୀ। ଏହି କଠୋର କାର୍ଯ୍ୟାନୁଷ୍ଠାନର ପରିଣାମସ୍ୱରୂପ, ବେଆଇନ ପ୍ରବାସୀଙ୍କୁ ରୋଜଗାର ଦେଉଥିବା ନିଯୁକ୍ତିଦାତାଙ୍କ ଉପରେ ମଧ୍ୟ ଜୋରିମାନା ଲାଗୁ କରାଯାଇଛି। ଜଣେ ବେଆଇନ କର୍ମଚାରୀ ନିଯୁକ୍ତି ପାଇଁ ମାଲିକଙ୍କୁ ୬୦,୦୦୦ ପାଉଣ୍ଡ(୬୦ ଲକ୍ଷ ଟଙ୍କା) ପର୍ଯ୍ୟନ୍ତ ଜୋରିମାନା ଦେବାକୁ ପଡ଼ିପାରେ।
ୟୁକେରେ ରହୁଥିବା କିରପାଲ ସିଂହ କହିଛନ୍ତି ଯେ, ଏହି ପଦକ୍ଷେପ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କଠୋର ନିର୍ବାସନ ନୀତି ସହିତ ମେଳ ଖାଉଛି, ଯିଏକି ନିକଟରେ ବେଆଇନ ପ୍ରବାସୀଙ୍କ ବିରୋଧରେ ବଡ଼ ଧରଣର କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି। ବ୍ରିଟେନରେ ଏହି ଅଭିଯାନ ପରେ ଭାରତୀୟ ସମ୍ପ୍ରଦାୟଙ୍କ ଚିନ୍ତା ବଢିଯାଇଛି। ବିଶେଷକରି ଛୋଟ ବ୍ୟବସାୟ ମାଲିକମାନେ ଅଧିକ ଚିନ୍ତିତ, ଯେଉଁମାନେ ଡରୁଛନ୍ତି ଯେ ଯଦି ସେମାନଙ୍କ କର୍ମଚାରୀଙ୍କ ମଧ୍ୟରୁ କେହି ବେଆଇନ ପ୍ରବାସୀ ହୋଇଥାଆନ୍ତି ତେବେ ସେମାନଙ୍କ ମୋଟା ଅଙ୍କର ଜୋରିମାନା ଦେବାକୁ ପଡ଼ିପାରେ।
