ଭୁବନେଶ୍ୱର: ସ୍ୱଦେଶୀ ଜ୍ଞାନକୌଶଳରେ ନିର୍ମିତ ସ୍ୱଳ୍ପ ଦୂରଗାମୀ ବାଲିଷ୍ଟିକ କ୍ଷେପଣାସ୍ତ୍ର ପ୍ରଳୟର ଦ୍ୱିତୀୟ ସଫଳ ପରୀକ୍ଷା କରାଯାଇଛି । ଭାରତର ପ୍ରତିରକ୍ଷା ଓ ଗବେଷଣା ସଂଗଠନ (ଡିଆରଡିଓ) ପକ୍ଷରୁ ଗୁରୁବାର ଦିନ ଏହାକୁ ଓଡ଼ିଶା ଉପକୂଳରେ ଥିବା ଡଃ ଏ ପି ଜେ ଅବଦୁଲ କଲାମ ଦ୍ୱୀପରୁ ପରୀକ୍ଷା କରାଯାଇଥିଲା । ସୂଚନାଯୋଗ୍ୟ ଯେ ୨୪ ଘଣ୍ଟା ମଧ୍ୟରେ ଏହା ପ୍ରଳୟର ଦ୍ୱିତୀୟ ସଫଳ ପରୀକ୍ଷା ହୋଇଛି । ଏହି କ୍ଷେପଣାସ୍ତ୍ର ଭୂପୃଷ୍ଠରୁ ଭୂପୃଷ୍ଠକୁ ୧୫୦ରୁ ୫୦୦ କିଲୋମିଟର ଦୂରତା ପର୍ଯ୍ୟନ୍ତ ଲକ୍ଷ୍ୟଭେଦ କରିବାକୁ ସମର୍ଥ । ଏକ ଭ୍ରାମ୍ୟମାଣ ଲଞ୍ଚରରୁ ଏହାକୁ ଉତ୍କ୍ଷେପଣ କରାଯାଇଥିଲା । ବୁଧବାର ଅପେକ୍ଷା ଗୁରୁବାର ଏହାକୁ ଭିନ୍ନ ରେଞ୍ଜରେ ପରୀକ୍ଷା କରାଯାଇଥିଲା ଏବଂ ଏହା ସମସ୍ତ ଧାର୍ଯ୍ୟ ମାନକ ପୂରଣ କରିଥିବା ଜଣାଯାଇଛି । ଦେଶରେ ପ୍ରଥମ ଥର ପାଇଁ ସ୍ୱଦେଶୀ ସ୍ତରରେ ନିର୍ମିତ ଏକ କ୍ଷେପଣାସ୍ତ୍ରକୁ କ୍ରମାଗତ ଦୁଇଦିନ ଧରି ସଫଳତାର ସହିତ ପରୀକ୍ଷା କରାଯାଇଥିବା ସରକାରୀ ସୂତ୍ରରୁ କୁହାଯାଇଛି । ଏଥିରେ କଠିନ ଇନ୍ଧନ ବିଶିଷ୍ଟ ରକେଟ ମୋଟର ଏବଂ ଅନେକ ସର୍ବାଧୁନିକ ପ୍ରଯୁକ୍ତି ସନ୍ନିବେଶିତ ହୋଇଛି । ଏହାର ଗାଇଡାନ୍ସ ବ୍ୟବସ୍ଥାରେ ସର୍ବାଧୁନିକ ନାଭିଗେସନ ଏବଂ ସମନ୍ୱିତ ଆଭିଓନିକ୍ସ ରହିଛି । ଏହାର ସଫଳ ପରୀକ୍ଷା ପାଇଁ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଡିଆରଡିଓ ଏବଂ ସହଯୋଗୀ ଦଳକୁ ଅଭିନନ୍ଦନ ଜଣାଇଛନ୍ତି ।
Comments are closed.