ପିପିଲି/ଭୁବନେଶ୍ବର; ପୁରୀ ଜାତୀୟ ରାଜପଥର ପିପିଲି ବାଏପାସ ରାସ୍ତାରେ ମଙ୍ଗଳବାର ରାତିରେ ରାହାଜାନି ହୋଇଛି । ପୁରୀରୁ ଭୁବନେଶ୍ବର ଅଭିମୁଖେ ସ୍କୁଟରରେ ଫେରୁଥିବା ଏକ ଦମ୍ପତିଙ୍କୁ ଦୁର୍ବୃତ୍ତ ମାନେ ମରଣାନ୍ତକ ଆକ୍ରମଣକରି ସେମାନଙ୍କ ଠାରୁ ସୁନାଚେନ, ମଙ୍ଗଳସୂତ୍ର, ମୋବାଇଲ ଆଦି ଲୁଟି ନେଇଛନ୍ତି ।
ପୁରୁଣା ଭୁବନେଶ୍ବର ଶ୍ରୀରାମପୁର ବାସିନ୍ଦା ପ୍ରତାପ କୁମାର ସ୍ଵାଇଁ ଓ ତାଙ୍କ ପତ୍ନୀ ମିତାଲି ମଧୁସ୍ମିତା ମଙ୍ଗଳବାର ରାତିରେ ପୁରୀରୁ ଭୁବନେଶ୍ବର ସ୍ଥିତ ନିଜ ଘରକୁ ସ୍କୁଟରରେ ଫେରୁଥିବା ବେଳେ ପିପିଲି ବାଏପାସ ରାସ୍ତାର ତରାକାଜ ଛକ ନିକଟରେ ଲୁଟର ଶିକାର ହୋଇଥିଲେ । କେତେକ ଦୁର୍ବୃତ୍ତ ବାଇକରେ ଆସି ମାରଣାସ୍ତ୍ରରେ ସ୍ଵାମୀ ପ୍ରତାପଙ୍କ ଡାହାଣ ହାତକୁ ୩ ଚୋଟ ଓ ବାମ ହାତକୁ ୨ଚୋଟ ମାରିଥିଲେ । ଉଭୟ ଦମ୍ପତି ସୁଟରରୁ ତଳେ ପଡିଯିବା ପରେ ଦୁର୍ବୃତ୍ତମାନେ ତାଙ୍କ ଠାରୁ ମୋବାଇଲ, ସୁନାଚେନ୍, ମଙ୍ଗଳ ସୂତ୍ର, ଟଙ୍କା ଆଦି ଛଡାଇ ନେଇ ଫେରାର୍ ହୋଇ ଯାଇଥିଲେ ।
ପୁଲିସ ସେମାନଙ୍କୁ ଆମ୍ବୁଲାନ୍ସ ଯୋଗେ ପିପିଲି ମେଡିକାଲକୁ ଆଣିଥିବା ବେଳେ ପରେ ସେଠାରୁ କ୍ୟାପିଟାଲ ହସ୍ପିଟାଲକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି । ଏଥିରେ ମିତାଲି ସାମାନ୍ୟ ଆହତ ହୋଇଥିବା ବେଳେ ପ୍ରତାପ ଗୁରୁତର ଭାବେ ଆହତ ହୋଇଥିବା ସୂଚନା ମିଳିଛି । ଏନେଇ ଥାନାରେ କୌଣସି ଲିଖିତ ଅଭିଯୋଗ ହୋଇନଥିବା ବେଳେ ପୁଲିସ ଘଟଣାର ତଦନ୍ତ ଜାରି ରଖିଥିବା ସୂଚନା ମିଳିଛି । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଆଲୋଡନ ସ୍ରୁଷ୍ଟି କରିଛି ।
