ପିପିଲି: ଆସନ୍ତା ୨୪ ତାରିଖରେ ହେବାକୁ ଥିବା ପିପିଲି ପୌର ନିର୍ବାଚନ ପାଇଁ ବିଭିନ୍ନ ଦଳ ପକ୍ଷରୁ ପ୍ରଚାର ଜୋରଦାର ଚାଲିଥିବା ବେଳେ ନିର୍ବାଚନରେ ପ୍ରତିଦ୍ୱନ୍ଦିତା କରୁଥିବା ସମସ୍ତ ୫୬ଜଣ ପ୍ରାର୍ଥିଙ୍କୁ ନିର୍ବାଚନ ଅଧିକାରୀ ଆଦର୍ଶ ଆଚରଣ ବିଧି ଉଲ୍ଲଂଘନ ସଂକ୍ରାନ୍ତୀୟ ୨୪ ଘଣ୍ଟିଆ ନୋଟିସ ଜାରି କରିଛନ୍ତି।
ପ୍ରାପ୍ତ ସୂଚନା ଅନୁଯାୟୀ, ପିପିଲି ଏନ୍ଏସିର ୧୬ଟି ଯାକ ୱାର୍ଡରେ ଆଦର୍ଶ ଆଚରଣ ବିଧି ଉଲ୍ଲଂଘନ ହୋଇଥିବା ଅଭିଯୋଗ ହୋଇଥିଲା। ବିଭିନ୍ନ ସରକାରୀ କୋଠା, ସରକାରୀ ଜମି, ସର୍ବସାଧାରଣ ସ୍ଥାନ, ସର୍ବସାଧାରଣ ରାସ୍ତା, ବିଦ୍ୟୁତ ଖୁଣ୍ଟି, ଟେଲିଫୋନ ଖୁଣ୍ଟି ଆଦିରେ ବିଭିନ୍ନ ପ୍ରାର୍ଥିଙ୍କର ହୋଡିଂ, ବ୍ୟାନର, ପୋଷ୍ଟର, ପତାକା ଆଦି ଅନାଧିକୃତ ଭାବରେ ଲଗାଯାଇଥିବା ବେଳେ ଏସବୁକୁ ୨୦ ତାରିଖ ଅପରାହ୍ନ ୪ଟା ସୁଦ୍ଧା ହଟାଇ ନେବାକୁ ପିପିଲି ଏନ୍ଏସିର ନିର୍ବାଚନ ଅଧିକାରୀ ସପନ କୁମାର ନନ୍ଦ ସମସ୍ତ ୫୬ଜଣ ପ୍ରାର୍ଥିଙ୍କୁ ନୋଟିସ ଜାରି କରିଛନ୍ତି। ନିର୍ଦ୍ଧାରିତ ସମୟ ମଧ୍ୟରେ ଯେଉଁ ପ୍ରାର୍ଥିମାନେ ସେମାନଙ୍କ ବ୍ୟାନର, ପୋଷ୍ଟର, ହୋଡିଂ ଓ ପତାକାକୁ ଉକ୍ତ ସ୍ଥାନମାନଙ୍କରୁ ନ ହଟାଇବେ, ସେସବୁକୁ ନିର୍ବାଚନ ପାଇଁ ଗଠିତ ଏନଫୋର୍ସମେଣ୍ଟ ସ୍କ୍ୱାଡ଼ ହଟାଇବା ପାଇଁ ନିର୍ବାଚନ ଅଧିକାରୀ ନିର୍ଦ୍ଦେଶ ଦେଇଛନ୍ତି। ଉକ୍ତ ସ୍କ୍ୱାଡ଼କୁ ପିପିଲି ପୁଲିସ ସମସ୍ତ ପ୍ରକାର ସହାୟତା ପ୍ରଦାନ କରିବାକୁ ନିର୍ଦ୍ଦେଶ ଥିବା ବେଳେ ବ୍ୟାନର, ପୋଷ୍ଟର, ହୋଡିଂ ଓ ପତାକା ଆଦିକୁ ହଟାଇବା ପାଇଁ ଯେଉଁ ଅର୍ଥ ଖର୍ଚ୍ଚ ହେବ ତାକୁ ସଂପୃକ୍ତ ପ୍ରାର୍ଥିଙ୍କଠାରୁ ଆଦାୟ କରାଯିବ ବୋଲି ନିର୍ବାଚନ ଅଧିକାରୀ ଶ୍ରୀ ନନ୍ଦ ସୂଚନା ଦେଇଛନ୍ତି।
