ବିଦ୍ରୋହ କଲେ ୧୪ ସମିତି ସଭ୍ୟସଭ୍ୟା, ପାଟଣା ବ୍ଲକ ଅଧ୍ୟକ୍ଷାଙ୍କ ବିରୁଦ୍ଧରେ ଅନାସ୍ଥା ପ୍ରସ୍ତାବ

ପାଟଣା: ପାଟଣା ବ୍ଲକରେ ବିଜୁ ଜନତା ଦଳ ସମର୍ଥନ ରେ ବ୍ଲକ ଅଧ୍ୟକ୍ଷା ହୋଇଥିବା ବାଉଁସୁଳି ସମିତି ସଭ୍ୟା ସୁକାନ୍ତି ନାଏକଙ୍କୁ ପଦଚ୍ୟୁତ କରିବାକୁ ବିଦ୍ରୋହୀ ଅଣ୍ଟା ଭିଡିଛନ୍ତି। ବିଦ୍ରୋହ ପଛରେ ପୂର୍ବତନ ବ୍ଲକ ଅଧ୍ୟକ୍ଷ ବିଶ୍ଵନାଥ ନାୟକ ମୁଖ୍ୟ ନାୟକ ଥିବା ଜଣାପଡିଛି । ସୂଚନା ଯୋଗ୍ୟ ଯେ ଶ୍ରୀ ନାୟକ ଏବେ ପଲାଣଘାଟି ପଞ୍ଚାୟତର ସମିତି ସଭ୍ୟ ଥିବାବେଳେ ତାଙ୍କ ପତ୍ନୀ ଚିନାମାଳିପଶି ସମିତିସଭ୍ୟା ବିଣାପାଣି ନାୟକ ଏବେ ବ୍ଲକ ଉପାଧ୍ୟକ୍ଷା ଅଛନ୍ତି। ଆଜି ବ୍ଲକ ଅଧ୍ୟକ୍ଷ ଙ୍କ ବିରୁଦ୍ଧରେ ବ୍ଲକ ଅଞ୍ଚଳର ମୋଟ ୨୦ ଜଣ ସମିତି ସଭ୍ୟସଭ୍ୟାମାନଙ୍କ ମଧ୍ୟରୁ ୧୪ ଜଣ ସମିତି ସଭ୍ୟସଭ୍ୟାଙ୍କ ଦସ୍ତଖତ ସମ୍ବଳିତପତ୍ରରେ ଅନାସ୍ଥା ଅଣାଯିବାକୁ କେନ୍ଦୁଝର ଉପଜିଲ୍ଲାପାଳଙ୍କୁ ଦାବିପତ୍ର ଦିଆଯାଇଥିବା ଜଣାପଡିଛି। ଅଭିଯୋଗକୁ ଉପଜିଲ୍ଲାପାଳ ଗ୍ରହଣ କରିଥିବାରୁ ଏହାକୁ ନେଇ ପାଟଣା ଅଞ୍ଚଳରେ ରାଜନୀତି ଚଳ ଚଞ୍ଚଳ ହୋଇପଡିଛି।