ନୂଆଦିଲ୍ଲୀ : କଂଗ୍ରେସ ଯଦି ଆଗାମୀ ଲୋକସଭା ନିର୍ବାଚନରେ ବିଜୟୀ ହୁଏ ତା’ହେଲେ ସରକାର କର୍ତ୍ତବ୍ୟ ନିର୍ବାହ ସମୟରେ ପ୍ରାଣ ହରାଉଥିବା ସିଆରପିଏଫ ଯବାନଙ୍କୁ ‘ସହିଦ’ ସମ୍ମାନ ପ୍ରଦାନ କରିବାକୁ ଆଇନଗତ ବ୍ୟବସ୍ଥା କରିବ। ନୂଆଦିଲ୍ଲୀସ୍ଥିତ ଜବାହର ଲାଲ ନେହରୁ ଷ୍ଟାଡିୟମରେ ଶନିବାର ବିଶ୍ବବିଦ୍ୟାଳୟ ଛାତ୍ରମାନଙ୍କ ସହିତ ଆଲୋଚନାବେଳେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଏହି ପ୍ରତିଶ୍ରୁତି ଦେଇଛନ୍ତି। ପୁଲୱାମା ଆକ୍ରମଣ ପରେ ରାହୁଲ ଏହି ପ୍ରସଙ୍ଗ ଉତ୍ଥାପନ କରିଥିଲେ। ଟ୍ବିଟରରେ ସେ ଲେଖିଥିଲେ, ପୁଲୱାମା ଆତ୍ମଘାତୀ ବିସ୍ଫୋରଣରେ ୪୦ ସାହସୀ ଯବାନ ସହିଦ ହୋଇଛନ୍ତି। ସେମାନଙ୍କ ପରିବାର ପରିସ୍ଥିତି ସହ ଜୁଝୁଛି। ଯବାନ ଦେଶପାଇଁ ବଳୀଦାନ ଦେଇଛନ୍ତି; ଅଥଚ ସେମାନଙ୍କୁ ‘ସହିଦ’ ମାନ୍ୟତା ଦିଆଯାଇ ନାହିଁ। ରାଷ୍ଟ୍ରୀୟ ଜନତା ଦଳ ନେତା ତେଜସ୍ବୀ ଯାଦବ ମଧ୍ୟ ସମାନ ଦାବି ଉଠାଇଥିଲେ।
