ଇସଲାମାବାଦ : ପାକିସ୍ତାନରେ ହାହାକାର ପରିସ୍ଥିତି ଜାରି ରହିଛି। ଏଠାରେ ଦୈନନ୍ଦିନ ବ୍ୟବହାର ଉପଯୋଗୀ ଜିନିଷ ସହ ଖାଦ୍ୟ ଜିନିଷର ଘୋର ଅଭାବ ଲାଗି ରହିଛି। ପରିସ୍ଥିତି ଏପରି ହୋଇଛି ଯେ, ଲୋକମାନେ ଅଟା ଚୋରି କରିବାକୁ ବାଧ୍ୟ ହେଉଛନ୍ତି। ବର୍ତ୍ତମାନ ଏଭଳି ଘଟଣା ସାମ୍ନାକୁ ଆସିଛି, ଯେଉଁଠାରେ ଜଣେ ନାବାଳକ ଏକ ଦୋକାନରୁ ଅଟା ଚୋରି କରିବା ସମୟରେ ଉକ୍ତ ଦୋକାନୀ ଜଣକ ନାବାଳକୁ ଏକ ଖୁଣ୍ଟରେ ବାନ୍ଧି ଓଲଟା ଟାଙ୍ଗି ନିସ୍ତୁକ ମାଡ ମାରିଥିଲା। ଘଟଣାର ଭିଡିଓ ମଧ୍ୟ ସାମ୍ନାକୁ ଆସିଛି। ଏହାକୁ ସୋସିଆଲ ମିଡିଆରେ ଅନେକ ଲୋକେ ଦୋକାନୀର ଏଭଳି କାର୍ଯ୍ୟକୁ ତୀବ୍ର ନିନ୍ଦା କରିବା ସହ ରାଗରେ ଏହା ହୀନ କାର୍ଯ୍ୟ ବୋଲି କହିଛନ୍ତି। ଏହି ଘଟଣା ପରେ ପୁଲିସ ଅଭିଯୁକ୍ତ ଦୋକାନୀକୁ ଗିରଫ କରିଛି।
ଏହି ଘଟଣା ପାକିସ୍ତାନୀ ପଞ୍ଜାବର ମିଆନ୍ ଚାନ୍ନୁ ଅଞ୍ଚଳର। ଯେଉଁଠାରେ ଏକ ଦୋକାନରୁ ଜଣେ ନାବାଳକ ଅଟା ଚୋରି କରିବା ସମୟରେ ଧରାପଡିଥିଲା। ଏହା ପରେ ଦୋକାନୀ ଉକ୍ତ ନାବାଳକୁ ଏକ ଖୁଣ୍ଟରେ ବାନ୍ଧି ଓଲଟା ଟାଙ୍ଗି ନିସ୍ତୁକ ମାଡ ମାରିଥିଲା। ଏହି ସମୟରେ କେହି କେହି ଘଟଣାର ଏକ ଭିଡିଓ କରି ସୋସିଆଲ ମିଡିଆରେ ପୋଷ୍ଟ କରିଥିଲେ। ସୋସିଆଲ ମିଡିଆରେ ଲୋକମାନେ ଏଥିରେ କ୍ରୋଧିତ ହୋଇଥିଲେ। ଲୋକମାନେ ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିବା ଆରମ୍ଭ କରିଥିଲେ। ଏହା ପରେ ପୁଲିସ କାର୍ଯ୍ୟାନୁଷ୍ଠାନ ଗ୍ରହଣ କରି ଅଭିଯୁକ୍ତ ଦୋକାନୀକୁ ଗିରଫ କରିଥିଲା।
ସୂଚନାନୁସାରେ ଗତ କିଛି ଦିନ ମଧ୍ୟରେ ପାକିସ୍ତାନରେ ଅଟାର ଘୋର ଅଭାବ ଦେଖାଦେଇଥିଲା। ଏହି ସମୟରେ ପାକିସ୍ତାନର ବିଭିନ୍ନ ସ୍ଥାନରେ ଅଟା ପାଇଁ ଲୋକଙ୍କ ଲମ୍ବା ଧାଡି ଦେଖିବାକୁ ମିଳିଥିଲା। ପରିସ୍ଥିତି ଏପରି ଥିଲା ଯେ ମାଗଣା ଅଟା ପାଇଁ ଦୌଡା ଦୌଡି ସମୟରେ ୨୦ ରୁ ଅଧିକ ଲୋକେ ପ୍ରାଣ ହରାଇଥିଲେ। ପାକିସ୍ତାନରେ ପର୍ଯ୍ୟାପ୍ତ ଗହମ ଉପଲବ୍ଧ ନ ଥିବାରୁ ୩୦-୪୦ ପ୍ରତିଶତ ମିଲ କାମ ବନ୍ଦ କରି ଦେଇଥିଲା। ଯେଉଁ କାରଣରୁ ଦେଶରେ ଅଟା ଅଭାବ ଦେଖାଦେଇଥିଲା।
ଗତକିଛି ଦିନ ହେବ ପାକିସ୍ତାନରେ ମହଙ୍ଗା ମାଡରେ ସର୍ବସାଧାରଣ ଅତିଷ୍ଠ ହୋଇପଡିଛନ୍ତି। ଖାଦ୍ୟ ସାମଗ୍ରୀର ମୂଲ୍ୟ ଆକାଶଛୁଆଁ ହେବା ଫଳରେ ସବୁଠାରୁ ଅଧିକ ପ୍ରଭାବ ଗରିବ ଓ ସାଧାରଣ ଲୋକଙ୍କ ଉପରେ ପଡୁଛି। ସବୁଠାରୁ ବଡ କ୍ଷତି ହେଉଛି ପାକିସ୍ତାନର ଗରିବ ଲୋକଙ୍କର। ଏହି କାରଣରୁ ଖାଦ୍ୟ ସାମଗ୍ରୀ ଚୋରି କରିବା ପରେ ଲୋକଙ୍କୁ ନିସ୍ତୁକ ମାଡର ଶିକାର ହେବା ଘଟଣା ସାମ୍ନାକୁ ଆସୁଛି।
Comments are closed.