ପିଓକେରେ ଆତଙ୍କବାଦୀଙ୍କ ସହିତ ଯୋଗାଯୋଗ ସୁଦୃଢ କରିବାରେ ଲାଗିଛି ପାକିସ୍ତାନ

ନୂଆଦିଲ୍ଲୀ: ଭାରତ ବିରୁଦ୍ଧରେ ଆତଙ୍କବାଦକୁ ପ୍ରୋତ୍ସାହନ ଦେବା କାର୍ଯ୍ୟକଳାପକୁ ଅଧିକ ବ୍ୟାପକ ଏବଂ ଭୟଙ୍କର କରିବାକୁ ପାକିସ୍ତାନ ଚଳାଇଥିବା କାର୍ଯ୍ୟକଳାପର ଆଉ ଏକ ବିଷୟ ସାମନାକୁ ଆସିଛି । ପାକ ଅଧିକୃତ କାଶ୍ମୀର ଭାରତ ବିରୋଧୀ କାର୍ଯ୍ୟକଳାପ ପାଇଁ ଆତଙ୍କିଙ୍କର ଅଭେଦ୍ୟ ଗଡ ପାଲଟିଥିବାବେଳେ ସେଠାରେ ଥିବା ବିଭିନ୍ନ ଆତଙ୍କି ସଂଗଠନର ତାଲିମ ସ୍ଥଳ ସହିତ ଯେଭଳି ପାକିସ୍ତାନ ସେନା ବରାବର ନିରବଚ୍ଛିନ୍ନ ଯୋଗାଯୋଗ ସ୍ଥାପନ କରିପାରିବେ ଏବଂ ବିଭିନ୍ନ ଆତଙ୍କି ସଂଗଠନ ମଧ୍ୟରେ ପରସ୍ପର ଯେଭଳି ସଂଯୋଗ ସ୍ଥାପନ କରାଯାଇପାରିବ, ସେଥିପାଇଁ ପାକିସ୍ତାନ ସରକାର ସଂପ୍ରତି ପାକ ଅଧିକୃତ କାଶ୍ମୀର (ପିଓକେ)ରେ ସଂଚାର ବ୍ୟବସ୍ଥାରେ ବ୍ୟାପକ ଆଧୁନିକରଣ ଆରମ୍ଭ କରିଛନ୍ତି । ପାକିସ୍ତାନର ସ୍ପେଶାଲ କମ୍ୟୁନିକେସନ ଅର୍ଗାନାଇଜେସନ (ଏସସିଓ) ପିଓକେରେ ଅପଟିକାଲ ଫାଇବର ବିଛାଇବା ସହିତ ମାଇକ୍ରୋୱେଭ ଏବଂ ଉପଗ୍ରହ ଭିତ୍ତିକ ଯୋଗାଯୋଗ ସ୍ଥାପନ ବ୍ୟବସ୍ଥା ନିର୍ମାଣ କରୁଛି । ଏହାଦ୍ୱାରା ପାକିସ୍ତାନ ଭାରତ ବିରୋଧୀ କାର୍ଯ୍ୟକଳାପକୁ ଅଧିକ ବ୍ୟାପକ କରିବା ସହିତ ପିଓକେରେ ପାକିସ୍ତାନ ବିରୋଧରେ ବିଷୋଦଗାର କରୁଥିବା ଲୋକଙ୍କ ଉପରେ ମଧ୍ୟ ନଜର ରଖିପାରିବ ବୋଲି ଜଣାଯାଇଛି । ଏହି କାର୍ଯ୍ୟକ୍ରମ ଅଧୀନରେ ପାକିସ୍ତାନ ତାହାର ୧୦ମ କର୍ପସ ଅଧୀନରେ ୫୦ଟି ସାମରିକ ସ୍ଥଳ ଏବଂ ଏହାଦ୍ୱାରା ପରିଚାଳିତ ୨ଟି ଡିଭିଜନ ଯଥା ଦ୍ୱାଦଶ ଡିଭିନ ଏବଂ ୨୩ଶ ଡିଭିଜନ ସହିତ ଯୋଗାଯୋଗ ସ୍ଥାପନ ଲକ୍ଷ୍ୟ ରଖିଛି । ଏଥିରେ ୩୯୫ କିଲୋମିଟର ଦୀର୍ଘ ଅପଟିକାଲ ଫାଇବର ସଂଯାଗ ଅନ୍ତର୍ଭୁକ୍ତ ।