ନୂଆଦିଲ୍ଲୀ : ଅନ୍ୟ କିଛି ଦେଶ ସହାୟତାରେ ଭାରତ ସହ ଲଢିବାକୁ ଆଗେଇ ଆସିଥିବା ପାକିସ୍ତାନକୁ ‘ଅପରେସନ ସିନ୍ଦୂର’ର ୨୪ ଘଣ୍ଟା ମଧ୍ୟରେ ଅନେକ କ୍ଷତି ସହିବାକୁ ପଡିଛି । ଭାରତର ଆକ୍ରମଣରେ ହୋଇଥିବା କ୍ଷତି ଭରଣା କରିବାକୁ ପାକିସ୍ତାନକୁ ଅନେକ ବର୍ଷ ଲାଗିପାରେ । ଏହା ମଧ୍ୟରେ ପାକିସ୍ତାନ ଇରାନରୁ ଶାହିଦ-୧୨୬ ଡ୍ରୋନ୍ ମାଗିଥିବା ଖବର ସାମ୍ନାକୁ ଆସିଛି । ଅପରେସନ ସିନ୍ଦୂର ପୂର୍ବରୁ ପାକିସ୍ତାନକୁ ତୁର୍କୀ କିଛି ଅସ୍ତ୍ରଶସ୍ତ୍ର ଯୋଗାଇ ଦେଇଥିଲା । କିନ୍ତୁ ଏବେ ତୁର୍କୀ ପାକିସ୍ତାନକୁ ଅସ୍ତ୍ରଶସ୍ତ୍ର ଦେଇଥିବା ପ୍ରତ୍ୟାଖାନ କରୁଛି ।
ଇରାନ ଚଳିତ ବର୍ଷ ଶାହିଦ ସିରିଜର ଡ୍ରୋନର ଅତ୍ୟାଧୁନିକ ଭର୍ସନ ଶାହିଦ-୧୪୯ ‘ଗାଜା’ ନାଁରେ ମାନବ ରହିତ ଯୁଦ୍ଧ ବିମାନ(ୟୁସିଏଭି)କୁ କାର୍ଯ୍ୟକ୍ଷମ କରିଥିଲା । ଇରାନର ଏହି ଡ୍ରୋନ ୫୦୦ରୁ ୧୦୦୦ କିଲୋମିଟର ପର୍ଯ୍ୟନ୍ତ ଆକ୍ରମଣ କରିବାରେ ସକ୍ଷମ । ଏଥିରେ ଇଲେକ୍ଟ୍ରୋ-ଅପ୍ଟିକାଲ ଏବଂ ଇନଫ୍ରାରେଡ୍ ସେନ୍ସର, ଲେଜର ରେଜଫାଇଣ୍ଡର ଓ ସାଟେଲାଇଟ୍ କମ୍ୟୁନିକେସନ ଆଣ୍ଟିନା ରହିଛି । ଏହା ୫୦୦ କିଲୋମିଟର ପରିସରରେ ନଜର ରଖିପାରିବ ଏବଂ ଅଦୃଶ୍ୟ ବିମାନର ପତ୍ତା ଲଗାଇବାରେ ସକ୍ଷମ ହେବ । ଏହା ଇରାନର ପୁରୁଣା ଶାହିଦ-୧୨୯ ମଡେଲର ଅତ୍ୟାଧୁନିକ ଭର୍ସନ, ଯେଉଁଥିରେ ଲୋଡିଂ କ୍ଷମତା ଓ ରେଞ୍ଜ ବୃଦ୍ଧି କରାଯାଇଛି ।
