ନୂଆଦିଲ୍ଲୀ : ୧୯୫୪ ମସିହାରୁ ଭାରତରେ ପଦ୍ମ ପୁରସ୍କାର ପ୍ରଦାନ ଆରମ୍ଭ ହେଇଥିଲା। ସେହି ଦିନଠାରୁ ଏପର୍ଯ୍ୟନ୍ତ ୨୭୨ ଜଣ ବିଦେଶୀ, ପ୍ରବାସୀ ଭାରତୀୟ ଓ ଭାରତୀୟ ବଂଶୋଦ୍ଭବମାନଙ୍କୁ ଏହି ପୁରସ୍କାର ଦିଆଯାଇଥିବା ସରକାର ସୂଚନା ଦେଇଛନ୍ତି।
ଗୃହ ରାଷ୍ଟ୍ରମନ୍ତ୍ରୀ ନିତ୍ୟାନନ୍ଦ ରାଏ ଲୋକସଭାରେ ଏକ ଲିଖିତ ଉତ୍ତରରେ କହିଛନ୍ତି, ବର୍ଣ୍ଣ, ପେଶା, ପଦବୀ ଓ ସ୍ତ୍ରୀ ପୁରୁଷ ତାରତମ୍ୟ ବିନା ପଦ୍ମ ପୁରସ୍କାର ପାଇଁ ଏମାନଙ୍କୁ ବିବେଚନା କରାଯାଇଛି। ଡାକ୍ତର ଓ ବୈଜ୍ଞାନିକମାନଙ୍କୁ ଛାଡ଼ି ଦେଲେ ସରକାରୀ ଚାକିରିଆ ଓ ରାଷ୍ଟ୍ରାୟତ ଉଦ୍ୟୋଗରେ କାର୍ଯ୍ୟରତ କର୍ମଚାରୀମାନଙ୍କୁ ପଦ୍ମ ପୁରସ୍କାର ପାଇଁ ବିବେଚନା କରାଯାଇ ନ ଥାଏ। ସେ କହିଛନ୍ତି, ନିଜ ତରଫରୁ ପଠାଯାଇଥିବା ମନୋନୟନ ପତ୍ର ଓ ସୁପାରିଶ ସମେତ ସବୁ ମନୋନୟନପତ୍ର ଗୁଡ଼ିକୁ ବିବେଚନା ପାଇଁ ପଦ୍ମ ପୁରସ୍କାର କମିଟି ନିକଟରେ ଉପସ୍ଥାପନ କରାଯାଇଥାଏ। ଏହି କମିଟି ବିଶିଷ୍ଟ ସାର୍ବଜନୀନ ସେବା କ୍ଷେତ୍ରରେ ଆଜୀବନ
ଅବଦାନ ପାଇଁ ପଦ୍ମ ପୁରସ୍କାର ଚୟନ କରିଥାନ୍ତି।
