ଭୁବନେଶ୍ୱର : ରାଜ୍ୟରୁ ନିଖୋଜ ହୋଇଥିବା ଶିଶୁଙ୍କୁ ଉଦ୍ଧାର କରିବା ଲାଗି କ୍ରାଇମ୍ବ୍ରାଞ୍ଚ ପକ୍ଷରୁ ଚଳିତମାସରେ ଆରମ୍ଭ ହୋଇଥିବା ଅପରେସନ୍ ପରୀ-୨ ଅଭିଯାନରେ ଏପର୍ଯ୍ୟନ୍ତ ୨୨୮୧ ଜଣ ଶିଶୁଙ୍କୁ ଉଦ୍ଧାର କରାଯାଇଛି। ରାଜ୍ୟ ବାହାରୁ ୯୨ ଜଣ ଶିଶୁଙ୍କୁ ଉଦ୍ଧାର କରାଯାଇଛି। ରାଜ୍ୟ ବାହାରୁ ଉଦ୍ଧାର ହୋଇଥିବା ଶିଶୁଙ୍କ ମଧ୍ୟରୁ ୪୯ ଜଣ ବୁଧବାର ଓଡ଼ିଶାରେ ପହଞ୍ଚିଛନ୍ତି। ତେଲେଙ୍ଗାନାରୁ ଉଦ୍ଧାର ହୋଇଥିବା ଏହି ଶିଶୁଙ୍କୁ ପୁଲିସ ମହାନିର୍ଦେଶକ ଡାକ୍ତର ରାଜେନ୍ଦ୍ର ପ୍ରସାଦ ଶର୍ମା ରାଜଧାନୀରେ ସ୍ୱାଗତ କରିଛନ୍ତି। ଉଦ୍ଧାର ହୋଇଥିବା କୁନିକୁନି ପିଲାମାନଙ୍କ ମଧ୍ୟରୁ କେତେକ ରାଜମୁନ୍ଦ୍ରୀର ଏକ ସେଲ୍ଟର ହୋମରେ ରହି ପଢ଼ୁଥିଲେ। ତେବେ ଉକ୍ତ ବିଦ୍ୟାଳୟରେ ତେଲୁଗୁ ପଢ଼ାଯାଉଥିବାରୁ ଏହି କୁନିକୁନି ପିଲାମାନେ ସେଠାରେ କିଛି ବୁଝି ପାରୁ ନ ଥିଲେ। ତେବେ ଏହି ପିଲାମାନେ ସେଠାକୁ କେମିତି ଗଲେ ସେନେଇ ପୁଲିସ ଓ ମହିଳା ଏବଂ ଶିଶୁ କଲ୍ୟାଣ ବିଭାଗର ଅଧିକାରୀମାନେ ଖୋଳତାଡ କରୁଛନ୍ତି। ସେମାନଙ୍କ ଜନ୍ମମାଟିକୁ ଫେରି ଆସିଥିବାରୁ କିପରି ସେମାନଙ୍କୁ ଥଇଥାନ କରାଯିବ ତାହା ମୁଖ୍ୟ ବିଷୟ ହୋଇଛି ବୋଲି ମହାନିର୍ଦେଶକ ଡାକ୍ତର ଶର୍ମା କହିଛନ୍ତି। ଉଦ୍ଧାର ହୋଇଥିବା ଏହି ଶିଶୁ ଗଜପତି, ଗଞ୍ଜାମ ଓ ବାଲେଶ୍ୱର ଜିଲାର ଥିବା ଜଣାପଡିଛି।
