ଭୁବନେଶ୍ୱର : ଅଖିଳ ଭାରତ କଂଗ୍ରେସ କମିଟି ପକ୍ଷରୁ ଶନିବାର ଓଡ଼ିଶା ପ୍ରଦେଶ କଂଗ୍ରେସ ମହିଳା ଓ ଏସ୍ସି ସେଲରେ ଅଧ୍ୟକ୍ଷରେ ପରିବର୍ତ୍ତନ କରାଯାଇଛି। ସର୍ବଭାରତୀୟ ମହିଳା କଂଗ୍ରେସ ସଭାନେତ୍ରୀ ସୁସ୍ମିତା ଦେବଙ୍କ ପ୍ରସ୍ତାବ ଏବଂ ଅଖିଳ ଭାରତ କଂଗ୍ରେସ କମିଟି (ଏଆଇସିସି) ସଭାପତି ରାହୁଳ ଗାନ୍ଧୀଙ୍କ ଅନୁମୋଦନକ୍ରମେ ଓଡ଼ିଶା ପ୍ରଦେଶ ମହିଳା କଂଗ୍ରେସର ନୂତନ ସଭାନେତ୍ରୀ ଭାବରେ ସୁମିତ୍ରା ଜେନାଙ୍କୁ ନିଯୁକ୍ତି ଦିଆଯାଇଛି। ଏଥିପାଇଁ ଶ୍ରୀମତୀ ଜେନା କଂଗ୍ରେସ ଅଧ୍ୟକ୍ଷ ରାହୁଳ ଗାନ୍ଧୀ ଏବଂ ସର୍ବଭାରତୀୟ ମହିଳା କଂଗ୍ରେସ ଅଧ୍ୟକ୍ଷା ସୁସ୍ମିତା ଦେବଙ୍କ ନିକଟରେ କୃତଜ୍ଞତା ଜ୍ଞାପନ କରିଛନ୍ତି। ଏକ ଗୁରୁତ୍ୱପୂର୍ଣ୍ଣ ସମୟରେ ଦଳର ମୁଖ୍ୟ ତାଙ୍କୁ ଏଭଳି ଗୁରୁଦାୟିତ୍ୱ ଅର୍ପଣ କରିଥିବାରୁ ସେ ତାହାକୁ ସଫଳତାର ସହିତ ତୁଲାଇବା ଦିଗରେ ଯତ୍ନବାନ ହେବେ। ଆଗାମୀ ଦିନରେ ଓଡ଼ିଶାରେ କିଭଳି ମହିଳାମାନଙ୍କୁ ସ୍ୱରକୁ ଶାଣିତ କରିହେବ ଏବଂ ତାଙ୍କର ନ୍ୟାଯ୍ୟ ହକ୍ ମିଳିବ ସେଦିଗରେ ସାଂଗ୍ରାମ ଜାରି ରହିବ ବୋଲି ସୁମିତ୍ରା କହିଛନ୍ତି।
ସେହିପରି ପ୍ରଦେଶ ଅନୁସୂଚିତଜାତି ବିଭାଗର ଅଧ୍ୟକ୍ଷ ଭାବେ କୃଷ୍ଣଚନ୍ଦ୍ର ଶଗରିଆଙ୍କ ସ୍ଥାନରେ ବିଭୂ ତରାଇଙ୍କୁ ନିଯୁକ୍ତି ଦିଆଯାଇଥିବାବେଳେ ପୂର୍ବତନ ମନ୍ତ୍ରୀ ଜଗନ୍ନାଥ ପଟ୍ଟନାୟକଙ୍କୁ ପିସିସିର କାର୍ଯ୍ୟନିର୍ବାହୀ ସଦସ୍ୟ ଭାବେ ନିଯୁକ୍ତି ଦିଆଯାଇଛି। ସେହିପରି କୃଷ୍ଣଚନ୍ଦ୍ର ଶଗରିଆଙ୍କୁ ପିସିସିର ସାଧାରଣ ସମ୍ପାଦକ ଭାବେ ନିଯୁକ୍ତି ଦିଆଯାଇଥିବା ଏଆଇସିସି ପକ୍ଷରୁ ଜଣାଯାଇଛି।
