ହରଭଙ୍ଗା: ହରଭଙ୍ଗା ବ୍ଲକରେ ସୂଚନା ଅଧିକାର ନିୟମ ପ୍ରହସନ ପାଲଟିଛି। ସୂଚନା ଅଧିକାର ଜରୀଆରେ ସାମାଜିକ କର୍ମୀ ତଥ୍ୟ ମାଗିଥିଲେ ସୁଦ୍ଧା ଅଧିକାରୀ ତଥ୍ୟ ଦେବାକୁ କୁନ୍ଥୁ କୁନ୍ଥୁ ହେଉଥିବା ଜଣାପଡ଼ିଛି। ଅଧିକାରୀଙ୍କ ତଥ୍ୟ ଦେବାରେ ପଛଘୁଂଚା ପରୋକ୍ଷରେ ୟା ପଛରେ ରହିଥିବା ଦୁର୍ନୀତିର ବାସ୍ନା ବାରିହୋଇପଡୁଛି। ପ୍ରକାଶ ଯେ କୁଶଙ୍ଗ ଗ୍ରାମର ଭୀକାରୀ ଚରଣ ବାଈ ଗତ ୦୩ ଜାନୁୟାରୀ ୨୦୨୩ରେ ପଂଚାୟତ ସମିତି କାର୍ୟ୍ୟାଳୟରେ ସ୍ୱଛଭାରତ ମିଶନରେ ନିର୍ମାଣ ଚାଲିଥିବା ପାଈଖାନା ନିର୍ମାଣ ଏବଂ ନଳକୂପଗୁଡିକରେ ନିର୍ମାଣ ହୋଇଥିବା ଭୂତଳ ଶୋଷକ ଗର୍ତ୍ତ ବାବଦରେ କିଛି ତଥ୍ୟ ସୂଚନା ଅଧିକାର ନିୟମ ପ୍ରକାରେ ମାଗିଥିଲେ। ବ୍ଲକ ସୂଚନା ଅଧିକାରୀ ଏବିଡିଓ ତାଙ୍କର ଆବେଦନପତ୍ର ଗ୍ରହଣ କରିବା ସହିତ ଏହି ବିଭାଗ ଦାୟିତ୍ୱରେ ଥିବା ଜଳ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀ ପ୍ରଦୀପ କୁମାର ଜେନାଙ୍କୁ ତଥ୍ୟ ପାଇଁ ପତ୍ର ମାଧ୍ୟମରେ ଅବଗତ କରାଇଥିଲେ। ମାତ୍ର ଆବେଦନର ଦୁଇମାସରୁ ଊର୍ଦ୍ଧ୍ବ ସମୟ ପରେ ବି ମାଗିଥିବା ତଥ୍ୟ ସାମାଜିକ କର୍ମୀଙ୍କୁ ଦିଆନଯିବା ଏବଂ ଏହାର ସ୍ପଷ୍ଟୀକରଣ ରଖାନଯିବା ପଛରେ କିଛି ମନ୍ଦ ଉଦେଶ୍ୟ ଏବଂ ଦୁର୍ନୀତିର ବାସ୍ନା ବାରି ହୋଇପଡୁଛି। ଶେଷରେ ସାମାଜିକ କର୍ମୀ ଜଣଙ୍କ ଏ ସର୍ମ୍ପକରେ ହରଭଙ୍ଗା ବି.ଡି.ଓଙ୍କ ପାଖରେ ପ୍ରଥମ ଅପିଲ କରିବା ପାଇଁ କହିଛନ୍ତି। ଅପିଲ ପରେ ସନ୍ତୋଷଜନକ ଉତର ନମିଳିଲେ ସେ ସୂଚନା ଅଧିକାରୀ କମିଶନର ଭୂବନେଶ୍ୱରଙ୍କ ଦ୍ୱାରସ୍ଥ ହେବେ ବୋଲି କହିଛନ୍ତି।
Comments are closed.