ଅନ୍ତର୍ଜାତୀୟ ମହିଳା ଦିବସ ଉପଲକ୍ଷେ ବିଭିନ୍ନ ପ୍ରତିଯୋଗିତା

ପିପିିଲି: ଅନ୍ତର୍ଜାତୀୟ ମହିଳା ଦିବସ ଉପଲକ୍ଷେ ପିପିଲି ସ୍ଥିତ ସମନ୍ୱିତ ଶିଶୁ ବିକାଶ ପ୍ରକଳ୍ପ ଅଧିକାରୀଣୀଙ୍କ କାର୍ଯ୍ୟାଳୟ ପକ୍ଷରୁ ସ୍ଥାନୀୟ ଶିରିଆପୁର ଆଦର୍ଶ ପ୍ରାଥମିକ ବିଦ୍ୟାଳୟ ଠାରେ ଶନିବାର ଦିନ ଛାତ୍ରଛାତ୍ରୀଙ୍କ ମଧ୍ୟରେ ବିଭିନ୍ନ ପ୍ରତିଯୋଗିତା ଅନୁଷ୍ଠିତ ହୋଇଯାଇଛି। ବ୍ଲକସ୍ତରୀୟ ଉଚ୍ଚ ପ୍ରାଥମିକ ଓ ଉଚ୍ଚ ବିଦ୍ୟାଳୟ ଛାତ୍ରଛାତ୍ରୀଙ୍କ ମଧ୍ୟରେ ଦୁଇଟି ବର୍ଗରେ ଓଡିଆ ପ୍ରବନ୍ଧ, ଇଂରାଜୀ ପ୍ରବନ୍ଧ, ଚିତ୍ରାଙ୍କନ ଓ କୁଇଜ୍‌‌ ପ୍ରତିଯୋଗିତାରେ ସମାଜ ଗଠନରେ ନାରୀର ଭୂମିକା, ଲିଙ୍ଗଗତ ସମାନତା, ପ୍ରେରଣାଦାୟୀ ମହିଳା, ମହିଳା ମାନଙ୍କର ଅଧିକାର, ମହିଳା ମାନଙ୍କ ଆର୍ଥିକ ସ୍ୱାଧୀନତା ଦିଗରେ ସୁଭଦ୍ରା ଯୋଜନା ଏକ ପଦକ୍ଷେପ ଆଦି ବିଷୟ ଉପରେ ପ୍ରତିଯୋଗିତାମାନ ଅନୁଷ୍ଠିତ ହୋଇଥିଲା। ସିଆର୍‌‌ସିସି ଚିନ୍ତାମଣୀ ଓଝା, ଅକ୍ଷୟ ନାୟକ ସମସ୍ତ କାର୍ଯ୍ୟକ୍ରମକୁ ପରିଚାଳନା କରିଥିବା ବେଳେ ଶିକ୍ଷକ ଗଣନାଥ ବାରିକ, ଲକ୍ଷ୍ମୀପ୍ରିୟା ଦାସ, ଶୁଭସ୍ମିତା ଷଡଙ୍ଗୀ, ଗୀତାଞ୍ଜଳୀ ପାଣୀ ପ୍ରମୁଖ ବିଚାରପତି ଭାବେ ଦାୟିତ୍ୱ ତୁଳାଇଥିଲେ। ସିଠିପିଓଙ୍କ କାର୍ଯ୍ୟାଳୟର ସୁପରଭାଇଜର ଚାରୁଲତା ତରାଇ, ସୁଶ୍ରୀ ସଙ୍ଗିତା ସାମନ୍ତରାୟ, ରଶ୍ମିତା ମହାନ୍ତି, ସୌଦାମିନୀ ମହାପାତ୍ର, ଚନ୍ଦନା ରାୟ, ସରୋଜିନୀ ମହାପାତ୍ର ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ। ଏହି ଅବସରରେ ଅଙ୍ଗନୱାଡି କର୍ମୀ ଓ ସହାୟିକା ମାନଙ୍କ ମଧ୍ୟରେ କବାଡି, ଖୋ ଖୋ, ଦଉଡି ଟଣା, ରଙ୍ଗୋଲି, ଝୋଟି ଓ ସଙ୍ଗିତ ଆଦି ପ୍ରତିଯୋଗିତାମାନ ଅନୁଷ୍ଠିତ ହୋଇଥିଲା। ସମସ୍ତ ପ୍ରତିଯୋଗିତାରେ ପ୍ରଥମ ସ୍ଥାନ ଅଧିକାର କରିଥିବା ପ୍ରତିଯୋଗୀମାନେ ଜିଲାସ୍ତରୀୟ ପ୍ରତିଯୋଗିତାରେ ଭାଗ ନେବାକୁ ମନୋନୀତ ହୋଇଥିଲେ।