ଗୋପାଳପୁର: ଗୋପାଳପୁର-ବ୍ରହ୍ମପୁର ପ୍ରାୟ ୧୦ କିମି ରାସ୍ତାରେ ଆଲୋକୀକରଣ ବ୍ୟବସ୍ଥା ପୂର୍ବତନ ସାଂସଦ ଚନ୍ଦ୍ରଶେଖର ସାହୁଙ୍କ ହାତପାଣ୍ଠିରୁ ପ୍ରାୟ ୧ କୋଟି ୨୦ ଲକ୍ଷ ବିନିଯୋଗରେ ବ୍ରହ୍ମପୁର ଉନ୍ନୟନ କର୍ତ୍ତୁପକ୍ଷଙ୍କ ପକ୍ଷରୁ ଗତ ୨୦୨୨ରେ ନିର୍ମାଣ କରାଯାଇଥିଲା। ଏହା ମଧ୍ୟରେ ନିର୍ମାଣର ୨ ବର୍ଷ ବିତିଯାଇଥିବା ବେଳେ ବିଡିଏ ପାଖରେ ଏହି ଆଲୋକୀକରଣର ରକ୍ଷଣାବେକ୍ଷଣ ନିମନ୍ତେ ପାଣ୍ଠି ଅଭାବ ରହିଥିବାରୁ ପ୍ରଥମେ ବାହାଦୁର ପେଣ୍ଠ – ରାମଚନ୍ଦ୍ରପୁର ପ୍ରାୟ ଦେଢ଼ କିମି ରାସ୍ତା ଅନ୍ଧାର ହୋଇଯାଇଥିଲା। ଏହାର କିଛିଦିନ ପରେ ଡୁରା ଛକରୁ ବାହାଦୂର ପେଣ୍ଠ ଆଉ ଦେଢ଼ କିମି ରାସ୍ତା ଅନ୍ଧାର ହୋଇଗଲା। ଏହା ନେଇ ସ୍ଥାନୀୟ ଅଞ୍ଚଳବାସୀଙ୍କ ପକ୍ଷରୁ ନିର୍ବାଚିତ ଜନପ୍ରତିନିଧିଙ୍କ ଦୃଷ୍ଟି ଆକର୍ଷଣ କରିବା ସହ ବିଡ଼ିଏ ସମ୍ପାଦକଙ୍କୁ ମଧ୍ୟ ଏହା ନେଇ ଅବଗତ କରାଇବା ସହ ମରାମତି କରିବାକୁ ଅନୁରୋଧ କରିଥିଲେ। ରାସ୍ତା ଅନ୍ଧାର ରହୁଥିବାରୁ ସ୍ଥାନୀୟ ଅଞ୍ଚଳବାସୀ ସମେତ ଗୋପାଳପୁରକୁ ବୁଲିବାକୁ ଆସୁଥିବା ପର୍ଯ୍ୟଟକ ମାନେ ଅସୁବିଧାର ସମ୍ମୁଖୀନ ହୋଇଥିଲେ। ଏହାକୁ ନଜରରେ ରଖି ଡୁରା ପଞ୍ଚାୟତର ପୂର୍ବତନ ସରପଞ୍ଚ ଲକ୍ଷ୍ମୀ ନାରାୟଣ ପାତ୍ରଙ୍କ ପକ୍ଷରୁ ଅଞ୍ଚଳର କିଛି ଉତ୍ସାହୀ ଯୁବକଙ୍କୁ ଯୋଗାଡ଼ କରି ଲାଇଟ୍ ଗୁଡ଼ିକର ମରାମତି କରିଥିଲେ। ଯାହାଫଳରେ ବୁଧବାର ସନ୍ଧ୍ୟାରୁ ବନ୍ଦ ରହିଥିବା ଲାଇଟ୍ ଗୁଡ଼ିକ ଜଳିବା ସହ ରାସ୍ତା ଆଲୁଅ ହୋଇ ପାରିଛି। ଅନ୍ୟପଟେ ବ୍ରହ୍ମପୁର ଉନ୍ନୟନ କର୍ତ୍ତୁପକ୍ଷଙ୍କ ପକ୍ଷରୁ ଲାଇଟ୍ ଖଞ୍ଜା ଯାଉଥିବା ବେଳେ ଏହାର ରକ୍ଷଣାବେକ୍ଷଣ ନିମନ୍ତେ କୈାଣସି ବ୍ୟବସ୍ଥା ନକରିବା ନାନା ପ୍ରଶ୍ନବାଚୀ ସୃଷ୍ଟି କରିଛି।
Popular Categories
Previous article
Next article