ଇ-ନାମ୍‍ ବ୍ୟବସ୍ଥାରେ ଓଡ଼ିଶା ସମେତ ୧୨ ରାଜ୍ୟ ସାମିଲ

- ସହଜ ହେବ କୃଷି ଉତ୍ପାଦ ବିକ୍ରିବଟା

ସମାଜ ପୋର୍ଟାଲ ଡେସ୍କ: କୃଷି ମନ୍ତ୍ରଣାଳୟ ପାଇକାରୀ ବଜାରରେ ଭିଡ଼ କମ୍‍ କରାଇବା ଓ ସାମଗ୍ରୀଗୁଡ଼ିକର ଯୋଗାଣରେ ଉନ୍ନତି ଆଣିବା ପାଇଁ ଅନେକ ପଦକ୍ଷେପ ଗ୍ରହଣ କରିଛି। ଜାତୀୟ କୃଷି ବଜାର, ଇ-ନାମ୍‍ ପୋର୍ଟାଲ୍‍ରେ ଆଉ ଦୁଇଟି ନୂଆ ମଡୁଲ୍‍ ଯୋଡ଼ାଯାଇ ଏଥିରେ ଉନ୍ନତି ଅଣାଯାଇଛି। ସେହି ଦୁଇ ମଡୁଲ ମଧ୍ୟରେ ଗୋଦାମ ଭିତ୍ତିକ ବାଣିଜ୍ୟ ମଡୁଲ ଓ କୃଷକ ଏବଂ ତତ୍‍ ସମ୍ବନ୍ଧୀୟ ପଦାର୍ଥ ଉତ୍ପାଦକାରୀ ସଂଗଠନ ମଡୁଲ ଅନ୍ତର୍ଭୁକ୍ତ। ଗୋଦାମ ଭିତ୍ତିକ ବ୍ୟବସାୟୀକ ମଡୁଲ୍‍ ଦ୍ୱାରା କୃଷକମାନେ ଗୋଦାମ ବିକାଶ ଓ ନିୟନ୍ତ୍ରଣ କର୍ତ୍ତୃପକ୍ଷରୁ ସେମାନଙ୍କର ଉତ୍ପାଦିତ ସାମଗ୍ରୀଗୁଡ଼ିକର ବିକ୍ରୟ କରିପାରିବେ।

ପଞ୍ଜିକୃତ ଗୋଦାମଗୁଡ଼ିକୁ ବଜାରର ମାନ୍ୟତା ଦିଆଯାଇଛି। ଏଫ୍‍ପିଓ ବ୍ୟବସାୟ ମଡୁଲ ଅନୁସାରେ ଏଫ୍‍ପିଓଗୁଡ଼ିକ ସଂଗ୍ରହ କେନ୍ଦ୍ରଗୁଡ଼ିକରୁ ସେମାନଙ୍କ ଉତ୍ପାଦିତ ପଦାର୍ଥଗୁଡ଼ିକୁ ଅପଲୋଡ଼ କରିପାରିବେ। ମଣ୍ଡିଗୁଡ଼ିକୁ ନଯାଇ ଅନ୍‍ଲାଇନ୍‍ ମାଧ୍ୟମରେ ଏହି କାର୍ଯ୍ୟ କରାଯାଇ ପାରିବ। ଆମ ସମ୍ବାଦଦାତା ଜଣାଇଛନ୍ତି, ପଞ୍ଜାବ, ଓଡ଼ିଶା, ଗୁଜରାଟ, ରାଜସ୍ଥାନ, ପଶ୍ଚିମବଙ୍ଗ, ମହାରାଷ୍ଟ୍ର, ତାମିଲନାଡୁ, ଓ ଉତ୍ତରପ୍ରଦେଶ ସମେତ ୧୨ଟି ରାଜ୍ୟର କୃଷକ ଓ ତତ୍‍ସମ୍ବନ୍ଧୀୟ ପଦାର୍ଥ ଉତ୍ପାଦନକାରୀ ସଂଗଠନଗୁଡ଼ିକ ଏହି ବ୍ୟବସ୍ଥାରେ ସାମିଲ ହୋଇଛନ୍ତି।

Comments are closed.