ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଉଚ୍ଚ ନ୍ୟାୟାଳୟଙ୍କ ରାୟ, ସ୍ୱାମୀ ପାଇଁ ସ୍ତ୍ରୀ ନାଁରେ ହେବନି ଭିଜିଲାନ୍ସ ମାମଲା

କଟକ: ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାରେ ଉଚ୍ଚ ନ୍ୟାୟାଳୟ ଗୁରୁତ୍ବପୂର୍ଣ୍ଣ ରାୟ ପ୍ରଦାନ କରିଛନ୍ତି। ସ୍ୱାମୀଙ୍କ ପାଇଁ ସ୍ତ୍ରୀ ନାମରେ ଭିଜିଲାନ୍ସ ମାମଲା ରୁଜୁ ହୋଇପାରିବ ନାହିଁ ବୋଲି ଅଦାଲତ ଏକ ରାୟରେ କହିଛନ୍ତି। ଅାବେଦନକାରିଣୀ ଇ. ସ୍ୱର୍ଣ୍ଣଲତାଙ୍କ ସ୍ୱାମୀଙ୍କ ନାମରେ ବ୍ରହ୍ମପୁର ଭିଜିଲାନ୍ସ ପକ୍ଷରୁ ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ମାମଲା ରୁଜୁ ହୋଇଥିଲା। ଭିଜିଲାନ୍ସ ସ୍ୱର୍ଣ୍ଣଲତାଙ୍କ ନାମରେ ମଧ୍ୟ ମାମଲା ରୁଜୁ କରିଥିଲେ। ଏହା ବିରୋଧରେ ସେ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ। ବିଚାରପତି ଶିବ ଶଙ୍କର ମିଶ୍ର ଏହି ମାମଲାରେ ରାୟ ପ୍ରକାଶ କରି ଅାବେଦନକାରିଣୀଙ୍କ ବିରୋଧରେ ରୁଜୁ ଭିଜିଲାନ୍ସ ମାମଲାକୁ ରଦ୍ଦ କରିଦେଇଛନ୍ତି। ଅଦାଲତ କହିଛନ୍ତି, ସ୍ତ୍ରୀ ତାଙ୍କ ସ୍ୱାମୀଙ୍କୁ ସମ୍ପତ୍ତି ବଢ଼଼ାଇବା ଲାଗି କୌଣସି ପ୍ରକାର ପ୍ରୋତ୍ସାହିତ କରିବାର ପ୍ରମାଣ ନାହିଁ। ଜଣେ ଗୃହିଣୀ ସ୍ୱାଭାବିକ ଭାବେ ନିଜ ସ୍ୱାମୀଙ୍କ ଇଚ୍ଛାକୁ ସମ୍ମାନ ଜଣାଇଥାନ୍ତି।

ସ୍ୱାମୀ ତାଙ୍କ ସ୍ତ୍ରୀଙ୍କ ନାମରେ ସ୍ଥାବର ଅସ୍ଥାବର ସମ୍ପତ୍ତି କିଣିବାକୁ ଚାହୁଁଥିବେ ତାହେଲେ ସେ ତାଙ୍କ ଇଚ୍ଛା ବିରୋଧରେ ଯାଇ ମନାକରିପାରିବେ ନାହିଁ। ଏଭଳି କ୍ଷେତ୍ରରେ ପତ୍ନୀଙ୍କୁ ଏହି ସମ୍ପତ୍ତି ଠୁଳ କରିବା ଅଭିଯୋଗରେ ଦାୟୀ କରାଯାଇ ପାରିବ ନାହିଁ ବୋଲି ଉଚ୍ଚ ନ୍ୟାୟାଳୟ ମତ େଦଇଛନ୍ତି। ଯଦି ସମ୍ପତ୍ତି ଠୁଳ କରିବା ପାଇଁ ପତ୍ନୀଙ୍କୁ ଦାୟୀ କରାଯିବ ତେବେ ମୁଖ୍ୟ ଅଭିଯୁକ୍ତଙ୍କ ପରିବାରର ଅନ୍ୟ ସଦସ୍ୟଙ୍କ ନାଁରେ କାହିଁକି ମାମଲା ରୁଜୁ କରାଯିବ ନାହିଁ ବୋଲି ଅଦାଲତ ପ୍ରଶ୍ନ କରିଛନ୍ତି। ଏହି ମାମଲାରେ ଅାବେଦନକାରିଣୀଙ୍କ ନାମରେ ଭିଜିଲାନ୍ସ ମାମଲା ରୁଜୁ ହୋଇପାରିବ ନାହିଁ ବୋଲି ଅଦାଲତ ଆଦେଶରେ ସ୍ପଷ୍ଟ କରିଛନ୍ତି।

ବ୍ରହ୍ମପୁର ଭିଜିଲାନ୍ସ ସେଲ ଅାବେଦନକାରିଣୀଙ୍କ ସ୍ୱାମୀଙ୍କ ନାମରେ ଆୟ ବହିର୍ଭୂତ ସମ୍ପତ୍ତି ଠୁଳ କରିବା ଅଭିଯୋଗରେ ମାମଲା ରୁଜୁ କରିଥିଲା। ଏହି ମାମଲାରେ ଆବେଦନକାରିଣୀ ତଥା ତାଙ୍କ ସ୍ତ୍ରୀଙ୍କ ନାମକୁ ଭିଜିଲାନ୍ସ ଯୋଡ଼ିଥିଲା। ତାଙ୍କ ବିରୋଧରେ ଭିଜିଲାନ୍ସ ପକ୍ଷରୁ କ୍ରିମିନାଲ ପ୍ରୋସିଡିଂ ମଧ୍ୟ କରାଯାଇଥିଲା। ଏହାକୁ ରଦ୍ଦ ପାଇଁ ଅାବେଦନକାରିଣୀ ଉଚ୍ଚ ନ୍ୟାୟାଳୟଙ୍କ ଦ୍ୱାରସ୍ଥ ହୋଇଥିଲେ। ଆବେଦନକାରିଣୀଙ୍କ ପକ୍ଷରୁ ଅାଇନଜୀବୀ ବିଷ୍ଣୁ ପ୍ରସାଦ ପ୍ରଧାନ ମାମଲା ପରିଚାଳନା କରୁଥିଲେ।