ଅକ୍ଲାଣ୍ଡ: ନ୍ୟୁଜିଲାଣ୍ଡର ଅକ୍ଲାଣ୍ଡରେ ଚାଲିଥିବା ପ୍ରଥମ ଟି-୨୦ରେ ଭାରତ ପାଇଁ ୨୦୪ ରନ୍ର ବିଜୟ ଲକ୍ଷ୍ୟ ଧାର୍ଯ୍ୟ କରିଛି ଘରୋଇ ଦଳ। ରସ୍ ଟେଲର, କେନ୍ ଉଇଲିୟମସନ୍ସ ଏବଂ କୋଲିନ ମୁନରୋଙ୍କ ଧୂଆଁଧାର ଅର୍ଦ୍ଧଶତକ ବଳଦରେ ନ୍ୟୁଜିଲାଣ୍ଡ ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ହରାଇ ୨୦୩ ରନ୍ କରିବାରେ ସଫଳ ହୋଇଛି। ମାର୍ଟିନ ଗୁପ୍ଟିଲ ଏବଂ ମୁନରୋଙ୍କ ଦୃଢ଼ ପ୍ରାରମ୍ଭ ଦଳକୁ ଏକ ମଜଭୁତ ସ୍ଥିତିରେ ପହଞ୍ଚାଇଥିଲା। ଗୁପ୍ଟିଲ ୧୯ ବଲରେ ୩୦ ରନ୍ ସଂଗ୍ରହ କରିଥିବାବେଳେ ମୁନରୋ ୪୨ ବଲରେ ୫୯ ରନ୍ କରି ଆଉଟ୍ ହୋଇଥିଲେ। ଉଇଲିୟମସନ୍ ୨୬ ବଲରେ ୫୧ ଏବଂ ଟେଲର ୨୭ ବଲରେ ୫୪ ରନ୍ କରିଥିଲେ।
ଭାରତ ଟସ୍ ଜିତି ପ୍ରଥମେ ବୋଲିଂ କରିବାକୁ ନିଷ୍ପତ୍ତି ନେଇଥିଲା। କିନ୍ତୁ ଭାରତୀୟ ବୋଲରମାନେ ସଅଳ ଉଇକେଟ ନେବାରେ ବିଫଳ ହୋଇଥିଲେ। ନ୍ୟୁଜିଲାଣ୍ଡ ୭.୫ ଓଭରରେ ୮୦ ରନ୍ କରିଥିବାବେଳେ ଦୁବେ ଗୁପ୍ଟିଲଙ୍କୁ ଆଉଟ କରି ଭାରତ ପାଇଁ ପ୍ରଥମ ସଫଳତା ଦେଇଥିଲେ। ଏହା ପରେ କ୍ରମାଗତ ଭାବେ ୧୧୬ରେ ୨ୟ ଏବଂ ୧୧୮ରେ ୩ୟ ଉଇକେଟର ପତନ ହୋଇଥିଲେ ହେଁ ଭାରତୀୟ ବୋଲରମାନେ ନ୍ୟୁଜିଲାଣ୍ଡକୁ ବଡ଼ ସ୍କୋର କରିବାରୁ ଅଟକାଇ ପାରି ନ ଥିଲେ। ଭାରତ ପକ୍ଷରୁ ଯଶପ୍ରୀତ୍ ବୁମରା, ଶାର୍ଦୁଲ ଠାକୁର, ରବୀନ୍ଦ୍ର ଜାଡେଦା, ଶିବମ ଦୁବେ ଏବଂ ୟୁଜଭେନ୍ଦ୍ର ଚହଲ ଗୋଟିଏ ଲେଖାଏ ଉଇକେଟ୍ ନେଇଥିଲେ। ସୂଚନାଯୋଗ୍ୟ, ଭାରତର ଏହି ଗସ୍ତ ସମୟରେ ଦୁଇ ଦଳ ମଧ୍ୟରେ ୫ଟି ଟି-୨୦, ୩ଟି ଦିନିକିଆ ଏବଂ ୨ଟି ଟେଷ୍ଟ ମ୍ୟାଚ ଖେଳାଯିବ।
