ଟିଟିଲାଗଡ଼: ସଇନ୍ତଳା ଥାନା ଅନ୍ତର୍ଗତ ଧରପଗଡ଼ ଗ୍ରାମର ସତ୍ୟନାରାୟଣ ପୁରୋହିତଙ୍କ ହତ୍ୟାକଣ୍ଡ ଘଟଣାରେ ଅଭିଯୁକ୍ତ ଜବନାନନ୍ଦ କୁଅଁରକୁ ପୁଲିସ ଗିରଫ କରିଛି। ଏନେଇ ସଇନ୍ତଳା ଥାନା ପରିସରରେ ଏକ ସାମ୍ବାଦିକ ସମ୍ମିଳନୀ ମାଧ୍ୟମରେ ବଲାଙ୍ଗୀର ଏସପି ସନ୍ଦୀପ ସମ୍ପଦ, ଟିଟିଲାଗଡ଼ ଏସଡ଼ିପିଓ ସୁରେନ୍ଦ୍ର ନାରାୟଣ ଶତପଥୀ, ସଇନ୍ତଳା ଆଇଆଇସି ବାରିଣୀ ଦାସ ସୂଚନା ଦେଇଛନ୍ତି।
ସୂଚନାଯୋଗ୍ୟ, ଗତ ଅକ୍ଟୋବର ୨୪ ତାରିଖ ରାତିରେ ସତ୍ୟନାରାୟଣ ପୁରୋହିତ ନିଜ ଦୋକାନରେ ଶୋଇଥିବା ବେଳେ ଦୁର୍ବୃତ୍ତମାନେ ତାଙ୍କୁ ଧାରୁଆ ଅସ୍ତ୍ରରେ ତଣ୍ଟି କାଟି ହତ୍ୟା କରିବା ସହ ସୁନା ଗହଣା ଲୁଟ କରିଥିବା ଅଭିଯୋଗ ହୋଇଥିଲା। ପୁଲିସ ଶନିବାର ବିଳମ୍ବିତ ରାତିରେ ବଡ଼ମାଲ ରେଳ ଷ୍ଟେସନ ନିକଟସ୍ଥ ରେଳ ଧାରଣା ନିକଟରୁ ସନ୍ଧାନୀ କୁକୁର ସହାୟତାରେ ହତ୍ୟାକାଣ୍ଡରେ ବ୍ୟବହୃତ ମାରଣା ଅସ୍ତ୍ର ଜବତ କରିଥିଲା। ଏହାପରେ ହତ୍ୟାକାରୀକୁ ଗିରଫ କରିବା ସହ କୋର୍ଟ ଚାଲାଣ କରିଥିବା ଜଣାପଡ଼ିଛି।
