ସମାଜ ଡିଜିଟାଲ ଡେସ୍କ: ଚଳିତ ପ୍ୟାରିସ ଅଲିମ୍ପିକ୍ସରେ ରୌପ୍ୟ ପଦକ ଜିତିଥିବା ଭାରତୀୟ କ୍ରୀଡ଼ାବିତ୍ ନୀରଜ ଚୋପ୍ରା ନିଜର ଭଦ୍ର ଏବଂ ସରଳ ବ୍ୟକ୍ତିତ୍ଵ ପାଇଁ ସର୍ବତ୍ର ପରିଚିତ। ଗତ ଟୋକିଓ ଅଲିମ୍ପିକ୍ସରେ ସେ ଭାରତକୁ ସ୍ଵର୍ଣ୍ଣ ପଦକ ଭେଟି ଦେଇଥିଲେ। ଏଥର କିନ୍ତୁ ପାକିସ୍ତାନୀ କ୍ରୀଡ଼ାବିତ ଅରଶଦ ନଦୀମ ବାଜି ମାରିନେଇଥିଲେ। ହେଲେ ଏଥିରେ ଅଦୌ ଅସନ୍ତୁଷ୍ଟ ହୋଇ ନ ଥିଲେ ନୀରଜ। ବରଂ ସେ ତାଙ୍କ ପ୍ରତିଦ୍ଵନ୍ଦ୍ଵୀ ନଦୀମଙ୍କୁ ତୁରନ୍ତ ଶୁଭେଚ୍ଛା ଜଣାଇଥିଲେ।
Neeraj Chopra ने कहाँ Gold Medal सोचा कर आया था लेकिन Medal तो medal होता है 🇮🇳❤️ pic.twitter.com/LAcObqtYcO
— Pooja Bishnoi (@poojabishnoi36) August 10, 2024
ନିଜର ବ୍ୟକ୍ତିତ୍ଵ ପାଇଁ ଚର୍ଚ୍ଚାରେ ରହିଆସିଥିବା ନୀରଜଙ୍କର ଏକ ଭିଡିଓ ବର୍ତ୍ତମାନ ସାମାଜିକ ଗଣମାଧ୍ୟମରେ ଘୂରି ବୁଲୁଛି। ଏକ ଉତ୍ସବରେ ଯୋଗଦେବା ଅବସରରେ ସେ ଅତି ଭଦ୍ରତା ସହକାରେ ଦେଶବାସୀଙ୍କୁ କ୍ଷମାପ୍ରାର୍ଥନା କରୁଛନ୍ତି। ତେବେ କ୍ଷମାପ୍ରାର୍ଥନାର କାରଣ ହେଉଛି ଚଳିତ ଅଲିମ୍ପିକ୍ସରେ ତାଙ୍କର ପ୍ରଦର୍ଶନ। ଭିଡିଓରେ ନୀରଜ ନିଜର ରୌପ୍ୟ ପଦକକୁ ଦେଖାଇ କହୁଛନ୍ତି, ଅଧିକ କିଛି କହିବାକୁ ନାହିଁ, କିନ୍ତୁ ମୁଁ କିଛି ଆଣିଛି ତୁମମାନଙ୍କୁ ଦେଖାଇବାକୁ। ମୁଁ ଦୁଃଖିତ, ଗତଥର ପରି ଏଥର ଜାତୀୟ ସଙ୍ଗୀନ ବାଜିଲାନି। ଯାହା ମୁଁ ଭାବିଥିଲି, ତାହା ହେଲାନାହିଁ। କିନ୍ତୁ ପଦକ ତ ପଦକ। ମୁଁ କଠିନ ପରିଶ୍ରମ କରିଥିଲି ଏବଂ ଦେଶ ପାଇଁ ଏକ ପଦକ ଜିତିଛି। ନୀରଜଙ୍କ ଏପରି ବାର୍ତ୍ତା ଉତ୍ସବରେ ଯୋଗଦେଇଥିବା ହଜାର ହଜାର ଲୋକଙ୍କୁ ଭାବବିହ୍ବଳ କରିଦେଇଥିଲା। ନୀରଜ ହେଉଛନ୍ତି ଏକମାତ୍ର ଭାରତୀୟ କ୍ରୀଡ଼ାବିତ୍, ଯିଏକି ଅଲିମ୍ପିକ୍ସରେ ସ୍ଵର୍ଣ୍ଣ ଏବଂ ରୌପ୍ୟ ପଦକ ବିଜୟୀ ହୋଇଛନ୍ତି।
